យោងតាមប្រភពដែលពាក់ព័ន្ធក្នុងការត្រៀមរៀបចំបាននិយាយកាលពីថ្ងៃព្រហស្បតិ៍ថា ព្រែកជីកប៉ាណាម៉ា នឹងចាប់ផ្តើមការពិភាក្សាឆាប់ៗនេះជាមួយក្រុមហ៊ុននានាអំពីការចាប់ផ្ដើមដេញថ្លៃប្រកួតប្រជែងនៅក្នុងត្រីមាសទី១ឆ្នាំក្រោយនេះ ដែលនឹងផ្តល់កំពង់ផែថ្មីចំនួន២សម្រាប់ការសាងសង់និងធ្វើប្រតិបត្តិការនៅក្នុងតំបន់នោះ។

កំពង់ផែ គឺជាផ្នែកមួយនៃផែនការពង្រីកដ៏ទូលំទូលាយត្រូវបានរៀបចំដោយរដ្ឋបាលផ្លូវទឹក។ វាមានគោលបំណងបង្កើនសេវាកម្មទាក់ទងនឹងការដឹកជញ្ជូនទំនិញ រួមទាំងការដឹកជញ្ជូនទំនិញឆ្លងកាត់ ការស្តុកទុក ការដឹកជញ្ជូនឧស្ម័ន និងដើម្បីធានាបានទឹកសាបសម្រាប់ប្រតិបត្តិការ។ 

អាជ្ញាធរព្រែកជីកប៉ាណាម៉ា ពុំបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ប៉ុន្តែនាយកប្រតិបត្តិជាន់ខ្ពស់ បាននិយាយកាលពីពេលមុនថា ផ្លូវទឹកនេះគ្រោងនឹងវិនិយោគចំនួនទឹកប្រាក់៨,៥ពាន់លានដុល្លារក្នុងរយៈពេល៥ឆ្នាំខាងមុខដើម្បីធ្វើបច្ចុប្បន្នភាព និងពង្រីកហេដ្ឋារចនាសម្ព័ន្ធព្រែកជីក។ គម្រោងសំខាន់ដែលរួមបញ្ចូលក្នុងផែនការ មានការសាងសង់ទំនប់ធំមួយដើម្បីផ្ទុកទឹកទន្លេ Indio និងបង្កើតអាងស្តុកទឹកថ្មីមួយ ដែលនឹងត្រូវបានពិភាក្សានៅតុលាការជាន់ខ្ពស់របស់ប្រទេសប៉ាណាម៉ា បន្ទាប់ពីសហគមន៍ដែលរងផលប៉ះពាល់ បានប្តឹងកាលពីខែមុន។

ប្រភពបាននិយាយបន្ថែមថា ការដេញថ្លៃមួយផ្សេងទៀតនឹងផ្តល់គម្រោងសាងសង់បំពង់បង្ហូរឧស្ម័នរាវនៅក្នុងតំបន់ព្រែកជីកនេះ ក៏កំពុងស្ថិតក្នុងការត្រៀមរៀបចំ ហើយអាចនឹងដាក់ឱ្យចាប់ផ្តើមនៅឆ្នាំក្រោយ។ ប្រធានាធិបតីសហរដ្ឋអាមេរិក លោក ដូណាល់ ត្រាំ នៅឆ្នាំនេះ បានគំរាមកាន់កាប់ព្រែកជីកប៉ាណាម៉ា ក្នុងពេលមានការរិះគន់ចំពោះអ្វីដែលរដ្ឋាភិបាលរបស់លោកបានហៅថា ការកើនឡើងឥទ្ធិពលរបស់ប្រទេសចិននៅប្រទេសអាមេរិកកណ្តាលមួយនេះ។