អាជ្ញាធរគ្រោះមហន្តរាយបាននិយាយនៅថ្ងៃសុក្រនេះថា ភ្លៀងមូសុងខ្លាំងបានបង្កឱ្យមានបំណាក់ដី និងទឹកជំនន់ដ៏គំហុកនៅទូទាំងភាគខាងជើងប្រទេសប៉ាគីស្ថាន ដោយបានបណ្តាលឲ្យមនុស្សយ៉ាងហោចណាស់៣០នាក់ស្លាប់ និងមនុស្សជាច្រើននាក់ទៀតជាប់ខ្លួននៅក្នុងបំណែកបាក់បែកលំនៅឋានរបស់ពួកគេ។ អាជ្ញាធរគ្រប់គ្រងគ្រោះមហន្តរាយក្នុងតំបន់បាននិយាយថា យ៉ាងហោចណាស់មនុស្ស២៣នាក់បានស្លាប់ក្នុងរយៈពេល២៤ម៉ោងចុងក្រោយនេះនៅក្នុងខេត្ត Khyber Pakhtunkhwa ជាតំបន់ភ្នំ ខណៈមនុស្ស៧នាក់ទៀតស្លាប់នៅតំបន់ Kashmir គ្រប់គ្រងដោយប្រទេសប៉ាគីស្ថាន។

ការិយាល័យឧតុនិយម បានចេញការព្រមានអំពីភ្លៀងធ្លាក់ខ្លាំងសម្រាប់ភាគពាយព្យ ដោយជំរុញឱ្យប្រជាជនជៀសវាង «ដំណើរមិនចាំបាច់ទៅកាន់តំបន់ងាយរងគ្រោះ»។ 

រដូវខ្យល់មូសុងប្រចាំឆ្នាំទៅកាន់អាស៊ីខាងត្បូងមានពី៧០ទៅ៨០ភាគរយនៃទឹកភ្លៀងដែលមានសារៈសំខាន់សម្រាប់កសិកម្ម និងសន្តិសុខស្បៀង ប៉ុន្តែក៏បាននាំមកនូវការបំផ្លិចបំផ្លាញផងដែរ។

កាលពីឆ្នាំ២០២២ ទឹកជំនន់ភ្លៀងមូសុងបានធ្វើឲ្យជន់លិចមួយភាគបីនៃប្រទេស និងបានបណ្តាលឲ្យមនុស្ស១.៧០០នាក់ស្លាប់។