បណ្ដាប្រទេសដែលកំពុងធ្វើការ ដើម្បីទម្លាយភាពជាប់គាំង និងឈានដល់ការបង្កើតសន្ធិសញ្ញាសកលដ៏សំខាន់មួយ ស្តីពីការប្រយុទ្ធប្រឆាំងនឹងការបំពុលដោយប្លាស្ទិក បានពិភាក្សាគ្នាពេញមួយយប់ រហូតដល់ថ្ងៃសុក្រ (ទី១៥ ខែសីហា) នេះ ជុំវិញសំណើដែលត្រូវបានកែសម្រួលនៅនាទីចុងក្រោយ។

ប្រភពចំនួន ២ មកពីរដ្ឋាភិបាលផ្សេងៗគ្នា បានប្រាប់បណ្ដាញសារព័ត៌មានថា សេចក្តីព្រាងថ្មីដែលចេញដោយប្រធានកិច្ចពិភាក្សា បន្ទាប់ពីថ្ងៃផុតកំណត់ដើម កាលពីថ្ងៃព្រហស្បតិ៍ បានកន្លងផុតទៅ មានឯកសារដែលមិនទាន់បានដោះស្រាយជាង ១០០ផ្នែក ប៉ុន្តែបង្កើតបានជា «មូលដ្ឋានដែលអាចទទួលយកបានសម្រាប់កិច្ចពិភាក្សា»។

យ៉ាងណាក្ដី អង្គការមិនមែនរដ្ឋាភិបាលផ្នែកបរិស្ថានមួយចំនួន បានលើកឡើងថា សេចក្ដីព្រាងនេះនៅតែមិនទាន់បានទៅឲ្យឆ្ងាយគ្រប់គ្រាន់នោះឡើយ ក្នុងការការពារសុខភាពមនុស្ស និងបរិស្ថាន។ បន្ទាប់ពីមានការចរចារយៈពេល ៣ឆ្នាំ ប្រទេសនានាដែលកំពុងស្វែងរកវិធានការច្បាស់លាស់ ដើម្បីទប់ស្កាត់កាកសំណល់ប្លាស្ទិកកំពុងព្យាយាមធ្វើឲ្យគម្លាតកាន់តែរួមតូចជាមួយក្រុមដែលដឹកនាំដោយរដ្ឋផលិតប្រេង។

ប្រធានកិច្ចពិភាក្សាលោក Luis Vayas Valdivieso បានចេញសេចក្តីព្រាងកំណែថ្មីរបស់លោក បន្ទាប់ពីប្រទេសនានា បានច្រានចោលយ៉ាងដាច់អហង្ការនូវកំណែមុន កាលពីថ្ងៃពុធ ដោយបានធ្វើឲ្យកិច្ចពិភាក្សាស្មុគស្មាញ។ កាលពីថ្ងៃព្រហស្បតិ៍ អ្នកការទូតអេក្វាឌ័រ បានចំណាយពេលពិគ្រោះយោបល់ដ៏តឹងតែងជាមួយក្រុមក្នុងតំបន់ជាច្រើន ដោយបង្កើតសេចក្តីព្រាងថ្មីមួយ ក្នុងគោលបំណងបំពេញចិត្តប្លុកធំៗទាំង២។

សម្ព័ន្ធមហិច្ឆិតាខ្ពស់ (High Ambition Coalition) ដែលរួមមានសហភាពអឺរ៉ុប អង់គ្លេស កាណាដា និងបណ្តាប្រទេសអាហ្វ្រិក និងអាមេរិកឡាទីនជាច្រើន ចង់បានភាសា ស្តីពីការកាត់បន្ថយការផលិតប្លាស្ទិក និងលុបបំបាត់សារធាតុគីមីពុលដែលប្រើក្នុងប្លាស្ទិក។ ចំណែកក្រុម Like-Minded Group ដែលត្រូវបានបង្កើតឡើងភាគច្រើនជារដ្ឋផលិតប្រេង រួមមានអារ៉ាប៊ីសាអ៊ូឌីត គុយវ៉ែត រុស្ស៊ី អ៊ីរ៉ង់ និងម៉ាឡេស៊ី កំពុងជំរុញឲ្យសន្ធិសញ្ញាផ្តោតជាសំខាន់លើការគ្រប់គ្រងកាកសំណល់៕