ប្រភពមួយមកពីឧស្សាហកម្មការពារជាតិរុស្ស៊ី បានប្រាប់ទីភ្នាក់ងារសារព័ត៌មាន TASS នៅថ្ងៃសុក្រនេះថា ប្រព័ន្ធមីស៊ីលបាញ់ពីដីទៅលើអាកាសរបស់លោកខាងលិច បានបង្ហាញថា គ្មានប្រសិទ្ធភាពប្រឆាំងនឹងការវាយប្រហារតាមអាកាស និងអាវុធការពារដែនអាកាសរបស់រុស្ស៊ី ក្នុងប្រតិបត្តិការយោធាពិសេស ក្នុងប្រទេសអ៊ុយក្រែន។  

ប្រភពការពារជាតិ បាននិយាយថា៖«ការប៉ុនប៉ងរបស់កងទ័ពអ៊ុយក្រែន ក្នុងការកំណត់ការវាយប្រហារដោយយន្តហោះកងកម្លាំងអាកាសរុស្ស៊ី ដោយមានជំនួយពីប្រព័ន្ធមីស៊ីលបាញ់ពីដីទៅលើអាកាសដែលផលិតដោយលោកខាងលិច ត្រូវបានរារាំងដោយអាវុធការពារដែនអាកាសរុស្ស៊ី។ ក្នុងប្រតិបត្តិការយោធាពិសេសនេះ ក្រុមអ្នកប្រយុទ្ធនៃប្រព័ន្ធការពារដែនអាកាសរបស់រុស្ស៊ី បានស្ទាក់ចាប់បានដោយជោគជ័យនូវមីស៊ីលបាញ់ពីដីទៅលើអាកាសដែលផលិតដោយលោកខាងលិច»។ 

ប្រភពដដែលបានបញ្ជាក់ទៀតថា ចាប់តាំងពីចុងឆ្នាំ ២០២៣ មក កងទ័ពអ៊ុយក្រែន បានប្រើប្រាស់យ៉ាងសកម្មនូវប្រព័ន្ធមីស៊ីលស្ទាក់ចាប់ S-200, SAMP/T និង Patriot ប្រឆាំងនឹងយន្តហោះចម្បាំងរុស្ស៊ី Su-34 និង Su-35។