តំបន់ភាគឦសាននីហ្សេរីយ៉ា ធ្លាប់ជាមជ្ឈមណ្ឌលស្បៀងអាហារសម្រាប់ប្រទេសមួយនេះ ដោយសារតំបន់នេះ សម្បូរដីមានជីជាតិសម្រាប់ការដាំដុះបន្លែ ផ្លែឈើ និងគ្រាប់ធុញ្ញជាតិ ។ បច្ចុប្បន្ន ប្រជាពលរដ្ឋរស់នៅក្នុងតំបន់មួយនេះ ជួបការលំបាកខ្លាំង ទាំងកង្វះខាតស្បៀងអាហារ និងឱសថ ម្យ៉ាងដោយសារការកាត់ផ្តាច់ជំនួយរបស់សហរដ្ឋអាមេរិក ។

ចាប់តាំងពីជម្លោះជាមួយក្រុមឧទ្ទាម Boko Haram ផ្ទុះឡើង ការផ្គត់ផ្គង់ស្បៀងអាហារបានធ្លាក់ចុះ ហើយបម្រែបម្រួលអាកាសធាតុ បានធ្វើឲ្យតំបន់មួយនេះ កាន់តែជួបបញ្ហាច្រើន ។

ក្រុមឧទ្ទាម Boko Haram មានបំណងចង់គ្រប់គ្រងតំបន់មួយនេះ ហើយពួកគេធ្វើសកម្មភាពកាន់តែខ្លាំងឡើង ចាប់តាំងពីឆ្នាំ ២០១១រហូតមក ។

ប្រតិបត្តិការរបស់ពួកគេភាគច្រើន បានធ្វើឡើងនៅរដ្ឋ Borno និងនៅតាមតំបន់ព្រំដែនជាមួយប្រទេសនីហ្សេ ឆាដ និងកាមរូន ។ ពួកគេទទួលបានការចាប់អារម្មណ៍ខ្លាំងរបស់សកលលោកកាលពីឆ្នាំ ២០១៤ ពេលដែលពួកគេចាប់ជម្រិតសិស្សស្រីនៅទីក្រុង Chibok ។ 

ការបែកបាក់ផ្ទៃក្នុង និងការឆ្លើយតបរបស់យោធានីហ្សេរីយ៉ា បានកាត់បន្ថយសមត្ថភាពរបស់ក្រុមមួយនេះ ក្នុងរយៈពេលប៉ុន្មានឆ្នាំកន្លងមកនេះ ប៉ុន្តែពួកគេនៅតែបន្តគ្រប់គ្រងដែនដីមួយចំនួនដដែល ។

មនុស្សជាង ៣៥.០០០នាក់ ត្រូវបានសម្លាប់នៅក្នុងការវាយប្រហាររបស់ក្រុមឧទ្ទាម Boko Haram ហើយមនុស្សជាង ២លាននាក់ បានជម្លៀសខ្លួន ៕