ទីភ្នាក់ងារជំនួយ បានព្រមានពីភាពអត់ឃ្លាននៅរដ្ឋ Rakhine ដែលហែកហួរដោយសារភ្លើងសង្រ្គាម នៅមីយ៉ាន់ម៉ា ក្នុងនោះកម្មវិធីស្បៀងអាហារពិភពលោក(WFP) បានធ្វើការអំពាវនាវបន្ទាន់ឲ្យមានការបរិច្ចាគស្បៀងបន្ថែមទៀត ដើម្បីចៀសវាងគ្រោះមហន្តរាយពេញបន្ទុក ។

ទីភ្នាក់ងារ WFP បានព្យាយាមផ្តល់ស្បៀងអាហារដល់មនុស្សជម្លៀសខ្លួនកើនឡើង នៅក្នុងរដ្ឋ Rakhine រួមទាំងជនជាតិភាគតិចរ៉ូមហ៊ីងយ៉ា ១៤ម៉ឺននាក់ ដែលរស់នៅក្នុងសំពត់តង់ ចាប់តាំងពីពួកគេបានរត់ភៀសខ្លួនចេញពីផ្ទះសម្បែងរបស់ពួកគេ អំឡុងការប្រយុទ្ធគ្នាកាលពីឆ្នាំ ២០១២ ។

សង្រ្គាមស៊ីវិលដែលឆាបឆេះឡើងដោយសាររដ្ឋប្រហារយោធាឆ្នាំ ២០២១ បានបំផ្លិចបំផ្លាញសេដ្ឋកិច្ចនៅទូទាំងប្រទេសមីយ៉ាន់ម៉ា ហើយនិងបង្កឲ្យមានតម្រូវការមនុស្សធម៌ធំធេង ។

ប៉ុន្តែស្ថានភាពនៅរដ្ឋ Rakhine ដែលត្រូវបានកាត់ផ្តាចចេញពីតំបន់ផ្សេងទៀតរបស់មីយ៉ាន់ម៉ា ដោយសារការបិទច្រករបស់យោធា ស្ថិតក្នុងស្ថានភាពធ្ងន់ធ្ងរជាងតំបន់ណាៗទាំងអស់ ។

នៅថ្ងៃទី ២០ ខែមេសា បុរសវ័យ៥០ឆ្នាំម្នាក់ រស់នៅក្នុងជំរំ Ohn Taw Kyi បានដាក់ថ្នាំសម្លាប់សត្វល្អិតលើអាហាររបស់លោក អាហារភរិយារបស់លោក និងកូន ២នាក់របស់លោក ។ លោកបានស្លាប់ ប៉ុន្តែក្រោយពីមានការធ្វើអន្តរាគមន៍ភ្លាមៗពីអ្នកជិតខាងលោក ពួកគេបានសង្រ្គោះសមាជិកគ្រួសារផ្សេងទៀតរបស់លោក ។

នៅខែមិថុនា គ្រួសារជនជាតិភាគតិចនៅរដ្ឋ Rakhine ៥នាក់ រស់នៅទីក្រុង Sittwe ត្រូវបានគេរាយការណ៍ថា បានស្លាប់ដោយសារវិធីសាស្រ្តតែមួយ ។

 ជនមូស្លីម ៤រូបរស់នៅក្នុងទីក្រុង Sittwe រដ្ឋ Rakhine និយាយប្រាប់ BBCថា អាហារក្សត់ខ្លាំងណាស់ ធ្វើឲ្យគ្រួសារមួយចំនួនដាច់ពោះស្លាប់ ៕