​យេមែន៖ ក្រុម​ឧទ្ទាម​ហួ​ធី​របស់​ប្រទេស​យេ​ម៉ែន​កាលពី​ថ្ងៃ​ចន្ទ​បាន​អះអាងថា ពួកគេ​នៅ​ពីក្រោយ​ការ​វាយ​ប្រហារ​សំដៅ​ទៅលើ​ទីតាំង​របស់​ប្រទេស​អារ៉ាប់​រួម​។ ការអះអាង​តាម​ទូរទស្សន៍​បានធ្វើ​ឡើង ​បន្ទាប់ពី​ការវាយប្រហារ​ដោយ​យន្តហោះ​ដ្រូ​ន​កាលពី​ថ្ងៃ​ចន្ទ​ ដែល​បាន​កំណត់​គោលដៅ​លើ​រោងចក្រ​ចម្រាញ់​ប្រេង​ក្នុង​ទីក្រុង Abu Dhabi បណ្ដាល​ឲ្យ​មនុស្ស​ ៣នាក់​ស្លាប់​។

ការវាយប្រហារ​នេះ​បាន​បង្ក​ឱ្យមាន​អគ្គិភ័យ​នៅ​ព្រលានយន្តហោះ​អន្តរជាតិ Abu Dhabi។ នៅក្នុង​សន្និសីទ​សារព័ត៌មាន​របស់​ក្រុម​ឧទ្ទាម​ហួ​ធី អ្នកនាំពាក្យ​យោធា​លោក Yehia Sarea បាន​និយាយថា កងកម្លាំង​របស់លោក​បាន​ប្រើ​ប្រាស់​មី​ស៊ី​ល​ផ្លោង និង​យន្តហោះ​ដ្រូ​នដើម្បី​វាយប្រហារ​អាកាសយានដ្ឋាន Abu Dhabi និង​ទីក្រុង Dubai ព្រមទាំង​រោងចក្រ​ចម្រាញ់​ប្រេង និង​ទីតាំង​ផ្សេងៗ​ទៀត​ក្នុងប្រទេស​អារ៉ាប់​រួម​។ អ្នកនាំពាក្យ​រូប​នេះ​មិនបាន​ផ្តល់​ភស្តុតាង​ផ្ទាល់​ដើម្បី​គាំទ្រ​ពី​ការអះអាង​នេះ​ទេ​។​ ​លោក Sarea បាន​បន្ត​ព្រមាន​ក្រុមហ៊ុន​បរទេស និង​ប្រជាជន​ថា ពួក​ឧទ្ទាម​នឹងបន្ថែម​គោលដៅ​របស់​ពួក​គេ​នៅក្នុង​ប្រទេស​អារ៉ាប់​រួម។ អារ៉ាប់​រួម​បាន​ចូលរួមនៅក្នុង​កិច្ចខិតខំ​ប្រឹងប្រែង​ដឹកនាំ​ដោយ​ប្រទេស​អា​រ៉ា​ប៊ី​សា​អូឌីត ​ប្រឆាំង​ទៅនឹង​ពួក​ឧទ្ទាមហួ​ធី​នៅ​ប្រទេស​យេ​ម៉ែន​។ ក្រុម​ហួ​ធីដែល​គាំទ្រ​ដោយ​ប្រទេស​អ៊ីរ៉ង់បាន​បណ្តេញ​រដ្ឋាភិបាល​ ដែល​គាំទ្រ​ដោយ​អន្តរជាតិ​របស់​ប្រទេស​យេ​ម៉ែន​កាលពី​ឆ្នាំ២០១៤​៕

អត្ថបទ៖ ប៊ុនថន