រូបភាពវីដេអូមួយ នៅថ្ងៃសុក្រ (ទី១៥ ខែសីហា) នេះ បានបង្ហាញឲ្យឃើញថា រដ្ឋមន្ត្រីសន្តិសុខជាតិស្តាំនិយមជ្រុលរបស់អ៊ីស្រាអែល បានទៅសួរសុខទុក្ខលោក Marwan Bargouti នៅក្នុងពន្ធនាគារ ហើយបានប្រាប់ទៅមេដឹកនាំដ៏លេចធ្លោរបស់ប៉ាឡេស្ទីនរូបនេះថា «អ្នកនឹងមិនទទួលបានជ័យជម្នះ» នោះទេ ដោយហេតុការណ៍ដ៏គួរភ្ញាក់ផ្អើលនេះ កើតឡើងមួយថ្ងៃបន្ទាប់ពីសមាជិកគណៈរដ្ឋមន្ត្រីប្រកាន់តឹងមួយរូបផ្សេងទៀត បានប្តេជ្ញាថា នឹងធ្វើឲ្យគំនិតបង្កើតរដ្ឋប៉ាឡេស្ទីនលែងមានរូបរាង។

រដ្ឋមន្ត្រីសន្តិសុខ លោក Itamar Ben-Gvir បានចែករំលែកវីដេអូនេះនៅលើគណនីបណ្ដាញសង្គម X របស់លោក ដោយបានប្រាប់ផងដែរដល់លោក Bargouti ជាឥស្សរជនបង្រួបបង្រួមដ៏មានសក្តានុពល ក្នុងចំណោមប្រជាជនប៉ាឡេស្ទីនដែលជាប់ពន្ធនាគារជាង ២ទសវត្សរ៍ថា អ្នកណាដែលគំរាមកំហែងដល់ប្រទេសអ៊ីស្រាអែល នឹងត្រូវលុបកម្ចាត់ចោល។

ការទៅកាន់ពន្ធនាគារនេះ បានកើតឡើងនៅដើមសប្តាហ៍នេះ ប៉ុន្តែបានផ្សាយសាធារណៈ បន្ទាប់ពីរដ្ឋមន្ត្រីហិរញ្ញវត្ថុជាតិនិយមជ្រុល លោក Bezalel Smotrich បាននិយាយថា នៅថ្ងៃព្រហស្បតិ៍ ការងារនឹងចាប់ផ្តើមលើការតាំងទីលំនៅដែលនឹងកាត់ផ្តាច់ក្រុងហ្សេរុយសាឡឹមខាងកើត ដែលប៉ាឡេស្ទីនចង់បានជារដ្ឋធានីសម្រាប់រដ្ឋនាពេលអនាគត ពីតំបន់ West Bank ផ្សេងទៀត។ ការិយាល័យរបស់លោក Smotrich បានឲ្យដឹងថា ចំណាត់ការនេះ នឹង «កប់» គំនិតចង់បង្កើតរដ្ឋប៉ាឡេស្ទីន។

នៅក្នុងវីដេអូឃ្លីបលើបណ្ដាញសង្គម X ដែលបានបង្ហាញឲ្យឃើញថា លោក Bargouti មើលទៅមានសភាពស្គមស្គាំង និងគ្មានកម្លាំងកំហែង លោក Ben Gvir បាននិយាយថា៖ «អ្នកនឹងមិនទទួលបានជ័យជម្នះទេ។ អ្នកណាដែលធ្វើឲ្យប្រជាជនអ៊ីស្រាអែលច្របូកច្របល់ អ្នកណាដែលសម្លាប់កូនចៅរបស់យើង អ្នកណាដែលសម្លាប់ស្ត្រីរបស់យើង យើងនឹងកម្ចាត់ចោល។ អ្នកត្រូវដឹងរឿងនេះ តាមរយៈប្រវត្តិសាស្ត្រ»។

ការិយាល័យនាយករដ្ឋមន្ត្រីអ៊ីស្រាអែល និងអ្នកនាំពាក្យរបស់លោក Ben-Gvir មិនបានឆ្លើយតបភ្លាមៗឡើយ សម្រាប់សំណើសុំការអត្ថាធិប្បាយ ពាក់ព័ន្ធនឹងវីដេអូនេះ៕