ប្រធានាធិបតីអាមេរិក លោក Donald Trump បាននិយាយថា រូបលោកនឹងមិនចរចាតំណាងឲ្យអ៊ុយក្រែននោះឡើយ នៅក្នុងជំនួបថ្ងៃសុក្រនេះ ជាមួយប្រធានាធិបតីរុស្ស៊ី លោក Vladimir Putin ហើយនឹងអនុញ្ញាតឲ្យទីក្រុងគីវសម្រេចដោយផ្ទាល់ថា តើត្រូវដោះដូរដែនដីជាមួយរុស្ស៊ីដែរ ឬយ៉ាងណា។

លោក Trump បានបញ្ជាក់ថា គោលដៅរបស់លោក គឺចង់ឲ្យភាគីទាំង២ ចាប់ផ្តើមការចរចា ជាមួយនឹងការដោះដូរដែនដីណាមួយដែលត្រូវបានប្រកាសនៅពេលនោះ។

លោក Trump បានប្រាប់អ្នកសារព័ត៌មាននៅលើយន្តហោះ Air Force One ថា៖ «ដំណើរការដោះដូរនោះ នឹងត្រូវបានលើកយកមកពិភាក្សា ប៉ុន្តែខ្ញុំត្រូវតែអនុញ្ញាតឲ្យអ៊ុយក្រែនធ្វើការសម្រេចដោយខ្លួនឯងផ្ទាល់ ហើយខ្ញុំគិតថា ពួកគេនឹងធ្វើការសម្រេចយ៉ាងត្រឹមត្រូវ។ ប៉ុន្តែខ្ញុំមិននៅទីនេះ ដើម្បីចរចាតំណាងឲ្យអ៊ុយក្រែនទេ ខ្ញុំនៅទីនេះដើម្បីនាំប្រទេសទាំង២ ឲ្យមកកាន់តុចរចា»។

ការកត់សម្គាល់របស់លោក Trump ទំនងជាផ្តល់ការធានាខ្លះដល់អ៊ុយក្រែន ដែលបារម្ភថា កិច្ចចរចា រវាងសហរដ្ឋអាមេរិក និងរុស្ស៊ី អាចបញ្ចប់ជម្លោះដោយការធ្វើឲ្យអ៊ុយក្រែនខាតបង់។ លោក Trump បាននិយាយថា ការវាយលុករបស់រុស្ស៊ី នៅអ៊ុយក្រែន ទំនងជាមានគោលបំណងជួយពង្រឹងការមានប្រៀបរបស់លោក Putin ក្នុងការចរចាណាមួយ ដើម្បីបញ្ចប់សង្គ្រាម។

តែយ៉ាងណាក្ដី ប្រធានាធិបតីអាមេរិក បានសង្កត់ធ្ងន់ថា លោករំពឹងថា ជំនួបរបស់លោកជាមួយលោក Putin នឹងបង្កើតបាននូវលទ្ធផលខ្លះ ដោយសារហានិភ័យ ពាក់ព័ន្ធនិងភាពទន់ខ្សោយ នៅក្នុងសេដ្ឋកិច្ចរុស្ស៊ី៕