ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ ទី១៥ សីហា ថា ប្រធានាធិបតីចិន លោក Xi Jinping បានប្រាប់លោកថា ប្រទេសចិននឹងមិនឈ្លានពានកោះតៃវ៉ាន់នោះទេ ខណៈលោក Trump កំពុងកាន់តំណែង។

លោក Trump បានធ្វើការអត្ថាធិប្បាយបែបនេះនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Fox News មុនពេលកិច្ចពិភាក្សាជាមួយប្រធានាធិបតីរុស្ស៊ីលោក Vladimir Putin ជុំវិញការឈ្លានពានរបស់ទីក្រុងមូស្គូលើអ៊ុយក្រែន។

«គាត់ប្រាប់ខ្ញុំថា ខ្ញុំនឹងមិនធ្វើអ្វីនោះទេ ដរាបណាលោកជាប្រធានាធិបតី»។ លោកប្រធានាធិបតី Xi បានប្រាប់ខ្ញុំបែបនេះ ហើយខ្ញុំបាននិយាយថា«ប្រសើរណាស់ ខ្ញុំវាយតម្លៃខ្ពស់ចំពោះរឿងនេះ ប៉ុន្តែលោកក៏បាននិយាយថា «លោកអត់ធ្មត់ណាស់ ហើយប្រទេសចិនក៏អត់ធ្មត់ខ្លាំងណាស់ដែរ»។

ប្រទេសចិនបានចាត់ទុកកោះតៃវ៉ាន់ជាដែនដីរបស់ខ្លួន ហើយបានប្តេជ្ញាថានឹង«បង្រួបបង្រួម» ជាមួយកោះគ្រប់គ្រងតាមបែបលទ្ធិប្រជាធិបតេយ្យនិងផ្តាច់ខ្លួនមួយនេះ ដោយប្រើប្រាស់កម្លាំងប្រសិនបើចាំបាច់។ កោះតៃវ៉ាន់ បានជំទាស់យ៉ាងខ្លាំងចំពោះការទាមទារដែនអធិបតេយ្យភាពរបស់ប្រទេសចិន។

ទោះបីជាទីក្រុងវ៉ាស៊ីនតោន ជាអ្នកផ្គត់ផ្គង់អាវុធដ៏ធំ និងជាអ្នកគាំទ្រអន្តរជាតិរបស់កោះតៃវ៉ាន់ក៏ដោយ ក៏សហរដ្ឋអាមេរិក ក៏ដូចជាប្រទេសភាគច្រើនទៀតដែរ ពុំមានទំនាក់ទំនងការទូតផ្លូវការជាមួយកោះនេះទេ។