គ្រួសាររបស់ប្តីប្រពន្ធជនជាតិម៉ាឡេស៊ីមួយគូដែលត្រូវបានដុតនៅកណ្តាលទីក្រុងបាងកក ខណៈពេលកំពុងសម្រាកលំហែកាយនោះ បារម្ភថា សំណងដែលផ្តល់ដោយរដ្ឋាភិបាលថៃ អាចនឹងមិនគ្រប់ថ្លៃព្យាបាលរបស់ពួកគេ។

លោក Ong Yik Leong អាយុ ២៦ឆ្នាំ និងអ្នកនាង Gan Xiao Zhen អាយុ ២៧ឆ្នាំ ត្រូវបានគេរាយការណ៍ថា កំពុងអង្គុយនៅលើជណ្តើរនៃផ្សារទំនើប Big C ទល់មុខផ្សារទំនើប Central World លើផ្លូវ Ratchadamri នៅពេលដែលបុរសជនជាតិថៃគ្មានការងារធ្វើ បានចាក់វត្ថុរាវលើអ្នកទាំង២ ពីខាងក្រោយ មុនពេលដុតពួកគេនៅម៉ោងប្រហែល ១០យប់ថ្ងៃព្រហស្បតិ៍ (ទី៧ ខែសីហា)។

កាលពីថ្ងៃចន្ទដើមសប្ដាហ៍នេះ រដ្ឋាភិបាលថៃ បានប្រាប់ថា ខ្លួននឹងចេញថ្លៃព្យាបាលរបស់ប្តីប្រពន្ធនេះ រហូតដល់ ៥០០.០០០បាត (១៥.៤០០ដុល្លារ) ក្នុងមនុស្សម្នាក់ បន្ថែមពីលើសំណងផ្លូវចិត្ត ៥០.០០០បាត ក្នុងម្នាក់ៗ។

យ៉ាងណាក្ដី អំឡុងពេលនិយាយទៅកាន់ទីភ្នាក់ងារសារព័ត៌មានម៉ាឡេស៊ី Bernama កាលពីថ្ងៃសុក្រ (ទី១៥ ខែសីហា) ឪពុករបស់ Gan គឺលោក Gan Kin In វ័យ ៨០ឆ្នាំ បាននិយាយថា គ្រួសារមានការព្រួយបារម្ភ អំពីការចំណាយលើថ្លៃព្យាបាល ដែលបានចំណាយដល់ប្រហែល ១៥០.០០០បបាតរួចហើយ បន្ទាប់ពីបានព្យាបាលត្រឹមតែជាង ១សប្តាហ៍ប៉ុណ្ណោះ។

សារព័ត៌មាន Bernama បានរាយការណ៍ថា ជាមួយគ្នានេះ ក្រុមគ្រួសារមានក្ដីបារម្ភថា ការចំណាយលើការព្យាបាល ក៏អាចលើសពីការធានារ៉ាប់រងដែរ ទោះបីជាវាមិនច្បាស់ថា តើជនរងគ្រោះមានធានារ៉ាប់រងផ្ទាល់ខ្លួនដែរ ឬអត់ក៏ដោយ។

គួរបញ្ជាក់ថា ជនសង្ស័យមានឈ្មោះ Varakorn Pubthaisong អាយុ ៣០ឆ្នាំ បានប្រព្រឹត្តអំពើនេះទៅលើជនរងគ្រោះ ដោយសារកំហឹងគ្មានការងារធ្វើ។ រូបគេបានរាយការណ៍ប្រាប់នគរបាលថា ខ្លួនគឺជាអតីតអ្នកប្រដាល់ដែលត្រូវបានបណ្តេញចេញពីការងារជាសន្តិសុខ។ រូបគេបានព្យាយាមរត់គេចពីកន្លែងកើតហេតុ ប៉ុន្តែត្រូវបានចាប់ឃាត់ខ្លួន៕