បណ្ដាមេដឹកនាំអឺរ៉ុប នៅថ្ងៃសៅរ៍ (ទី១៦ ខែសីហា) នេះ បានស្វាគមន៍កិច្ចប្រឹងប្រែងការទូតរបស់ប្រធានាធិបតីអាមេរិក លោក Donald Trump ក្នុងបំណងនាំមកនូវសន្តិភាព នៅអ៊ុយក្រែន ប៉ុន្តែបានទទូចថា រុស្ស៊ីគួរតែប្រឈមនឹងសម្ពាធបន្ថែមទៀត ប្រសិនបើគោលដៅនោះ គឺដើម្បីបញ្ចប់សង្រ្គាម។

លោក Trump បានទូរសព្ទទៅកាន់ប្រធានាធិបតីអ៊ុយក្រែន លោក Volodymyr Zelensky និងបណ្ដាមេដឹកនាំអឺរ៉ុបពីលើយន្តហោះ Air Force One ដើម្បីធ្វើការពន្យល់ បន្ទាប់ពីមានជំនួប នៅរដ្ឋ Alaska រវាងរូបលោក និងប្រធានាធិបតីរុស្ស៊ី លោក Vladimir Putin។

បណ្ដាមេដឹកនាអឺរ៉ុបបានបញ្ជាក់ជាថ្មីថា វានឹងអាស្រ័យលើអ៊ុយក្រែន ក្នុងការសម្រេចចិត្ត ទាក់ទងនឹងដែនដីរបស់ខ្លួន។ ថ្នាក់ដឹកនាំទាំងនោះ ក៏បានអះអាងជាថ្មីដែរថា អ៊ុយក្រែនត្រូវការការធានាសន្តិសុខដ៏រឹងមាំ ដើម្បីធានាថា កិច្ចព្រមព្រៀងសន្តិភាពណាមួយមានប្រសិទ្ធភាព ហើយប្តេជ្ញាបន្តផ្តល់ជំនួយយោធាដល់អ៊ុយក្រែន។

រដ្ឋមន្ត្រីការបរទេសន័រវែស លោក Espen Barth Eide បានប្រាប់អ្នកសារព័ត៌មាន នៅទីក្រុង Oslo ថា៖ «យើងត្រូវតែបន្តដាក់សម្ពាធលើរុស្ស៊ី ហើយថែមទាំងបង្កើនឲ្យកាន់តែខ្លាំងក្លាទៀតផង ដើម្បីផ្តល់សញ្ញាច្បាស់លាស់ដល់រុស្ស៊ីថា ខ្លួនត្រូវតែទទួលផល (សម្រាប់ការឈ្លានពានអ៊ុយក្រែន)»។

លោកបានបន្ថែមថា៖ «យើងត្រូវតែស្តាប់ពីបំណងប្រាថ្នា និងតម្រូវការរបស់អ៊ុយក្រែន។ យើងដឹងថា លោកប្រធានាធិបតី Putin ចង់បំបែកអឺរ៉ុប និងសហរដ្ឋអាមេរិក។ យើងត្រូវតែធ្វើអ្វីគ្រប់យ៉ាងដែលយើងអាចធ្វើបាន ដើម្បីបញ្ចៀសបញ្ហានោះ»៕