ទីក្រុងគីវ នៅថ្ងៃសៅរ៍ (ទី១៦ ខែសីហា) នេះ បានប្រាប់ឲ្យដឹងថា រុស្ស៊ីបានបាញ់យានដ្រូនវាយប្រហារ ៨៥គ្រឿង និងមីស៊ីលបាលីស្ទិក ១គ្រាប់ ទៅលើប្រទេសអ៊ុយក្រែនពេញមួយយប់ ពោលគឺតែបន្ទាប់ពីមេដឹកនាំរុស្ស៊ី លោក Vladimir Putin និងប្រធានាធិបតីអាមេរិក លោក Donald Trump បានជួបពិភាក្សាគ្នានៅរដ្ឋ Alaska។

កិច្ចប្រជុំដែលត្រូវបានរំពឹងទុកខ្ពស់ នៅក្នុងរដ្ឋដាច់ស្រយាលរបស់សហរដ្ឋអាមេរិក បានបញ្ចប់ទៅដោយមិនមានការរកច្រកចេញ ក្នុងការបញ្ឈប់ការឈ្លានពានរបស់រុស្ស៊ីលើអ៊ុយក្រែនរយៈពេលជាង ៣ឆ្នាំ។

កងកម្លាំងទ័ពអាកាសរបស់អ៊ុយក្រែន បានឲ្យដឹងថា ទីក្រុងមូស្គូបាន «វាយប្រហារដោយមីស៊ីលបាលីស្ទិក Iskander-M ១គ្រាប់ និងយានដ្រូនប្រភេទ Shahed ចំនួន ៨៥គ្រឿង» ខណៈពេលដែលកំពុងវាយប្រហារ «សមរភូមិជួរមុខ» នៅក្នុងតំបន់ចំនួន៤។

នៅក្នុងរបាយការណ៍ប្រចាំថ្ងៃរបស់ខ្លួន កងកម្លាំងទ័ពអាកាសបានបញ្ជាក់ថា ការវាយប្រហារនេះបានបន្តចូលដល់ «យប់ឆ្លងចូលថ្ងៃទី១៦ ខែសីហា» ហើយបានចាប់ផ្តើមកាលពីល្ងាចថ្ងៃទី១៥ ខែសីហា ជាពេលដែលលោក Putin និង Trump បានជួបពិភាក្សាគ្នា។ ជាមួយគ្នានេះ ទីក្រុងគីវ បានបន្ថែមថា ប្រព័ន្ធការពារដែនអាកាសរបស់ខ្លួន បានបាញ់ទម្លាក់យានដ្រូនចំនួន ៦១ គ្រឿង។

ជំនួបកំពូល Trump-Putin បានបញ្ចប់ទៅដោយគ្មានការប្រកាសបទឈប់បាញ់ បើទោះបីជាលោកខាងលិច បានដាក់សម្ពាធលើវិមានក្រឹមឡាំងអស់ជាច្រើនខែ ដើម្បីឲ្យប្តេជ្ញាបញ្ឈប់ការប្រយុទ្ធគ្នាក៏ដោយ៕