បាតុកររាប់ម៉ឺននាក់បានប្រមូលផ្តុំគ្នាកាលពីល្ងាចថ្ងៃអាទិត្យ ១៧ សីហា ក្នុងទីក្រុង Tel Aviv ដើម្បីអំពាវនាវឱ្យបញ្ចប់សង្គ្រាមនៅហ្កាហ្សា និងការដោះលែងចំណាប់ខ្មាំង ដែលជាបាតុកម្មមួយក្នុងចំណោមបាតុកម្មដ៏ធំបំផុតជាច្រើនក្នុងប្រទេសអ៊ីស្រាអែល ចាប់តាំងពីការចាប់ផ្តើមការប្រយុទ្ធគ្នាក្នុងខែតុលា ឆ្នាំ ២០២៣មក។

ការប្រមូលផ្ដុំនេះ ជាថ្ងៃបញ្ចប់នៃការតវ៉ាទូទាំងប្រទេស និងជាការធ្វើកូដកម្មដ៏ធំបំផុតដើម្បីដាក់សម្ពាធរដ្ឋាភិបាលឲ្យបញ្ឈប់យុទ្ធនាការយោធា។

ក្នុងអំឡុងការតវ៉ា ដែលគេហៅថា "ទីលានចំណាប់ខ្មាំង"នៅក្នុងទីលានចតុរង្គ Tel Aviv plaza ដែលជាចំណុចប្រមូលផ្ដុំដ៏សំខាន់សម្រាប់អ្នកតវ៉ាពេញមួយសង្រ្គាម ក្រុមអ្នកតវ៉ាបានស្រែកថា នាំពួកគេទាំងអស់ទៅផ្ទះវិញ! បញ្ឈប់សង្រ្គាម! ។

វេទិកាចំណាប់ខ្មាំង និងគ្រួសារបាត់ខ្លួន ដែលជាអ្នកផ្តួចផ្តើមគំនិតនៃថ្ងៃតវ៉ាបានប៉ាន់ប្រមាណថា មនុស្សប្រហែល ៥០ ម៉ឺននាក់បានចូលរួមក្នុងការធ្វើបាតុកម្មពេលល្ងាចក្នុងទីក្រុង Tel Aviv ដែលជាតួលេខមិនត្រូវបានបញ្ជាក់ដោយនគរបាលទេ។ 

អ្នកស្រី Einav Zangauker ម្តាយរបស់ចំណាប់ខ្មាំង ឈ្មោះ Matan និងបុគ្គលឈានមុខគេនៃចលនាតវ៉ាបាននិយាយថា យើងទាមទារឱ្យមានកិច្ចព្រមព្រៀងដ៏ទូលំទូលាយ និងអាចសម្រេចបាន និងការបញ្ចប់សង្រ្គាម។ យើងទាមទារអ្វីដែលត្រឹមត្រូវ សម្រាប់កូនរបស់យើង ។

ការតវ៉ានេះ បានកើតឡើងជាងមួយសប្ដាហ៍ បន្ទាប់ពីគណៈរដ្ឋមន្ត្រីសន្តិសុខរបស់អ៊ីស្រាអែល បានអនុម័តផែនការដណ្ដើមយកទីក្រុងហ្កាហ្សា   ២២ខែក្នុងសង្គ្រាម ដែលបានបង្កើតស្ថានភាពមនុស្សធម៌ដ៏ធ្ងន់ធ្ងរក្នុងដែនដីប៉ាឡេស្ទីនមួយនេះ៕