មន្ត្រីគោលនយោបាយការបរទេសម្នាក់បាននិយាយកាលពីថ្ងៃអាទិត្យ មុនជំនួបជាមួយមេដឹកនាំអ៊ុយក្រែន និងអឺរ៉ុប ដើម្បីបញ្ជាក់ពីព័ត៌មានលម្អិតនៃការធានាបានសន្តិសុខដែលអាចកើតមានសម្រាប់ទីក្រុងគីវ ថា លោកប្រធានាធិបតីសហរដ្ឋអាមេរិកលោក Donald Trump អាចផ្តល់ការការពារដូចជាសម្ព័ន្ធយោធាណាតូដែរ ដល់អ៊ុយក្រែន ហើយរុស្ស៊ីបើកចំហចំពោះគំនិតនេះ។

លោក Steve Witkoff បេសកជនពិសេសរបស់លោក Trump ប្រចាំប្រទេសរុស្ស៊ីបានប្រាប់សារព័ត៌មាន CNN ថា «យើងអាចសម្រេចបានសម្បទាននៅពេលបន្ទាប់ ដែលសហរដ្ឋអាមេរិកអាចផ្តល់ការការពារដូចនៅក្នុងមាត្រាទី៥»។ «សហរដ្ឋអាមេរិកអាចផ្តល់ការការពារក្នុងមាត្រាទី៥ ជាលើកដំបូងដែលយើងបានស្តាប់លឺ ដែលថា រុស្ស៊ីយល់ព្រមចំពោះរឿងនេះ»។

លោក Witkoff បាននិយាយសំដៅទៅលើមាត្រាទី៥ នៃសន្ធិសញ្ញាអាត្លង់ទិកខាងជើង ដែលចាត់ទុកការវាយប្រហារណាមួយប្រឆាំងនឹងសមាជិកមួយក្នុងចំណោមសមាជិកទាំង៣២ប្រទេសរបស់ខ្លួន ថាជាការវាយប្រហារលើទាំងអស់គ្នា។ លោកបាននិយាយថា ការធានាសន្តិសុខនៃទំហំនោះអាចត្រូវបានផ្តល់ឱ្យអ៊ុយក្រែនជំនួសឲ្យសមាជិកភាពណាតូ ដែលលោកPutin បានច្រានចោល។

 លោក Rubio រដ្ឋមន្ត្រីការបរទេសអាមេរិក បានប្រាប់ទូរទស្សន៍ CNN អំពីកិច្ចប្រជុំជាមួយលោកPutinថា «យើងបានធ្វើឱ្យមានវឌ្ឍនភាពមួយចំនួន យើងជឿជាក់ ហើយពេលនេះ យើងត្រូវតាមដានវឌ្ឍនភាពនោះ»។ «នៅទីបំផុត រឿងនេះនឹងឈានដល់ការជួបប្រជុំគ្នារវាងមេដឹកនាំទាំងបី លោក Zelenskiy លោកPutin និងលោកប្រធានាធិបតី Trump ដែលយើងអាចបញ្ចប់បាន ប៉ុន្តែយើងត្រូវធ្វើឱ្យរឿងនេះកាន់តែខិតជិត មុនពេលយើងឈានដល់ចំណុចនោះ»។ មន្ត្រីរុស្ស៊ី ប្រឆាំងនឹងទាហានលោកខាងលិចនៅក្នុងប្រទេសអ៊ុយក្រែន ប៉ុន្តែពុំបានច្រានចោលការធានាសន្តិសុខសម្រាប់ទីក្រុងគីវនោះទេ។