ភ្នំពេញ៖ ក្រសួងអប់រំ យុវជន និងកីឡា បានក្រើនរំលឹកឡើងវិញទៅដល់គ្រឹះស្ថានអប់រំទាំងរដ្ឋ និងឯកជន ឱ្យពង្រឹងការអនុវត្តវិធានការសុខភាពនៅតាមគ្រឹះស្ថានអប់រំ ដើម្បីទប់ស្កាត់ការឆ្លងរាលដាលនៃមេរោគកូវីដ-១៩ ជាពិសេសប្រភេទអូមីក្រុង។

ក្នុងសេចក្ដីណែនាំចេញនៅថ្ងៃនេះ ក្រសួងអប់រំ យុវជន និងកីឡា បញ្ជាក់ថា គ្រឹះស្ថានអប់រំទាំងអស់ ត្រូវបន្តអនុវត្តវិធានការ ៣ការពារ និង ៣កុំ ដូចជា លាងសម្អាតដៃឱ្យបានញឹកញាប់ ពាក់ម៉ាស់ការពារមាត់ និងច្រមុះ រក្សាគម្លាតសុវត្ថិភាពនៅក្នុងថ្នាក់រៀន និងបរិវេណសាលារៀន កុំទៅនៅកន្លែងបិទជិតគ្មានខ្យល់ចេញចូល កុំទៅកន្លែងមានមនុស្សកុះករ និងកុំប៉ះពាល់គ្នាដោយផ្ទាល់។

ក្រសួងអប់រំ ក៏បានណែនាំឱ្យបង្កើតគណៈកម្មការសុខភាពសិក្សានៅតាមស្ថាប័នគ្រប់គ្រងរដ្ឋបាលអប់រំ និងគ្រឹះស្ថានសិក្សាទូទាំងប្រទេស ដើម្បីសម្របសម្រួលលើការលើកកម្ពស់ការងារសុខភាពសិក្សា ជាពិសេសផ្ដោតលើអាយុជីវិតបុគ្គលិកអប់រំ និងអ្នកសិក្សា។

ក្រសួងក៏បានណែនាំផងដែរឱ្យបង្កើនល្បឿននៃការទៅទទួលយកការចាក់វ៉ាក់សាំងដូសជំរុញ និងដូសដំបូងៗ ដើម្បីបង្កើតភាពស៊ាំក្នុងសហគមន៍អប់រំ។

ក្រសួងអប់រំ យុវជន និងកីឡា បានចេញសេចក្ដីណែនាំបន្ថែមបែបនេះ បន្ទាប់ពីមានករណីឆ្លងលើសិស្សនៅក្នុងគ្រឹះស្ថានសិក្សាឯកជនមួយនៅរាជធានីភ្នំពេញកាលពីពេលថ្មីៗនេះ៕