យោងតាមសេចក្តីរាយការណ៍របស់ប្រព័ន្ធផ្សព្វផ្សាយអ៊ីស្រាអែលបានឲ្យដឹងថា កងទ័ពជើងទឹករបស់អ៊ីស្រាអែល បានធ្វើការវាយប្រហារលើរោងចក្រថាមពលនៅជិតរដ្ឋធានីសាណារបស់ប្រទេសយេម៉ែន ។

ទូរទស្សន៍ Al Masirah ដែលមានទំនាក់ទំនងជាមួយក្រុមហ៊ូទី បានរាយការណ៍ថា «ការឈ្លានពាន» បានធ្វើឱ្យខូចម៉ាស៊ីនភ្លើងនៅរោងចក្រថាមពល Hezyaz ដោយបង្កឱ្យមានអគ្គិភ័យដែលក្រោយមកត្រូវបានពន្លត់វិញ។

ឧបនាយករដ្ឋមន្ត្រីរបស់ប្រទេស បានបញ្ជាក់ថា ក្រុមបុគ្គលិកសង្គ្រោះបន្ទាន់ បានគ្រប់គ្រងទប់ស្កាត់ការខូចខាតបន្ថែមទៀត។ ពលរដ្ឋនៅក្នុងទីក្រុងសាណា ក៏បានរាយការណ៍ថាបានឮសំឡេងផ្ទុះយ៉ាងហោចណាស់ពីរគ្រាប់។

យោធាអ៊ីស្រាអែលបានអះអាងថា ទីតាំងនោះត្រូវបានប្រើប្រាស់ដោយក្រុមអ្នកប្រយុទ្ធហ៊ួទី។ ប៉ុន្តែពុំបានបង្ហាញភស្តុតាងអំពីភាពត្រឹមត្រូវនៃការវាយប្រហារលើស្ថានីយ៍ថាមពលស៊ីវិលនោះទេ ដោយបង្កើនការព្រួយបារម្ភថា ការវាយប្រហារនេះអាចបង្កជាឧក្រិដ្ឋកម្មសង្គ្រាម។

នៅក្នុងសេចក្តីថ្លែងការណ៍ធ្វើឡើងដោយបណ្តាញព័ត៌មានរបស់អ៊ីស្រាអែលកាលពីថ្ងៃអាទិត្យ យោធាបាននិយាយថា ការវាយប្រហារនេះគឺជាការឆ្លើយតបដោយផ្ទាល់ទៅនឹងការវាយប្រហាររបស់ក្រុមហ៊ួទីម្តងហើយម្តងទៀត រួមមានមីស៊ីលនិងយានដ្រូនដែលបានបាញ់ចូលទៅកាន់ប្រទេសអ៊ីស្រាអែល។

សហរដ្ឋអាមេរិក និងចក្រភពអង់គ្លេស ក៏បានធ្វើការទម្លាក់គ្រាប់បែកនៅប្រទេសយេម៉ែនផងដែរ ខណៈក្រុមក្រុមហ៊ូទី បានវាយប្រហារលើនាវាដែលជាប់ពាក់ព័ន្ធនឹងអ៊ីស្រាអែល ឆ្លងកាត់សមុទ្រក្រហម។ ក្រុមហ៊ូទីនិយាយថា ចំណាត់ការដែលបានធ្វើឲ្យរំខានដល់ពាណិជ្ជកម្មសកលដែលឆ្លងកាត់ផ្លូវទឹកនេះ គឺដើម្បីឆ្លើយតបទៅនឹងសង្គ្រាមរបស់អ៊ីស្រាអែល និងការបិទផ្លូវនៅតំបន់ហ្កាហ្សា។