ក្រុមអាជីវករ ដែលរកស៊ីខាងវិស័យចំណីសត្វ និងកសិផលក្នុងស្រុក បានអរគុណ និងដឹងគុណដល់ រាជរដ្ឋាភិបាលដែលបានជួយជ្រោមជ្រែង និងខិតខំស្វះស្វែងរកទីផ្សារជូនដល់ប្រជាពលរដ្ឋ ទាំងទីផ្សារក្នុងស្រុក និងក្រៅប្រទេស ក្រោយការបិទព្រំដែនរវាងកម្ពុជា និងថៃ។

អ្នកស្រី ទង ថន ម្ចាស់ឡសម្ងួត និងឃ្លាំងស្តុកទុកពោតក្រហម ក្នុងខេត្តប៉ៃលិន ដែលបានចាប់ផ្តើមអាជីវកម្មតាំងពីឆ្នាំ២០១១ បានប្រាប់ព័ត៍មាន ប៊ីធីវី ឱ្យដឹងថា ក្រុមហ៊ុនចំណីសត្វក្នុងខេត្តប៉ៃលិនបានទទួលទិញពោតក្រហម និងដំឡូងមី ពីទីតាំងអ្នកស្រី បន្ទាប់ពីកម្ពុជាមានបញ្ហាជាមួយនឹងប្រទេសជិតខាង។ អ្នកស្រី បានថ្លែងអំណរគុណចំពោះក្រសួងពាណិជ្ជកម្ម ដែលជាសេនាធិការរបស់រាជរដ្ឋាភិបាលកម្ពុជា ដែលបានជួយជ្រោមជ្រែងដល់អាជីវកម្មអ្នកស្រីឱ្យមានការនាំចេញទៅក្រុមហ៊ុនផលិតចំណីសត្វទាំងនៅក្នុងខេត្តប៉ៃលិន ភ្នំពេញ និងរហូតដល់ខេត្តកំពត។

អ្នកស្រីបានឱ្យដឹងទៀតថា ក្នុងមួយថ្ងៃ ឡសម្ងួតរបស់អ្នកស្រីអាចផលិតជាគ្រាប់ពោតស្ងួតសម្រាប់នាំចេញបានប្រមាណជា៥០០តោន ប៉ុន្តែតម្លៃមានការប្រែប្រួលទៅតាមទីផ្សារជាក់ស្តែង។ អ្នកស្រីបានបន្ថែមថា ពិតជាសប្បាយចិត្ត និងដឹងគុណខ្លាំងណាស់ដល់ក្រសួងពាណិជ្ជកម្ម ដែលបានយកចិត្តទុកដាក់ ពោលមិនមែនតែលើកដំបូងទេ តែជាច្រើនដងមកហើយដែលក្រសួងបានណែនាំ និងជួយដោះស្រាយបញ្ហាដែលយើងជួបប្រទះ។

 អ្នកកស្រី សំ ផល្លា ម្ចាស់ឡសំងួត ស្ថិតនៅសង្កាត់អូតាវ៉ៅ ក្រុង/ខេត្តប៉ៃលិន បានឱ្យដឹងស្រដៀងគ្នាដែរថា ទីតាំងអ្នកស្រីអាចស្តុកពោតក្រហមប្រមាណពី ៦ពាន់តោន ទៅ១ម៉ឺនតោន។ អ្នកស្រី បានបន្តថា ការងារដែលសម្រេចជោគជ័យរហូតមកទល់សព្វថ្ងៃនេះ គឺបានដោយសារការដឹកនាំប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជា រាប់ចាប់តាំងពីអាណត្តិដឹកនាំដោយសម្តេចតេជោ ហ៊ុន សែន រហូតមកដល់សម្តេចធិបតី ហ៊ុន ម៉ាណែត នាយករដ្ឋមន្រ្តីបច្ចុប្បន្ន។

នៅក្នុងឱកាសអញ្ជើញចុះពិនិត្យទីតាំងឡសម្ងួត និងឃ្លាំងស្តុកទុកពោតក្រហម នៅខេត្តបាត់ដំបង និងខេត្តប៉ៃលិន កាលពីថ្ងៃអាទិត្យ សប្តាហ៍មុននេះ លោកជំទាវ តោ ពិឡា រដ្ឋលេធិការក្រសួងពាណិជ្ជកម្ម បានស្នើសុំឲ្យម្ចាស់ឡសម្ងួត ទទួលទិញពោតក្រហមក្នុងខេត្ត សូមជួយបន្តទិញពោតក្រហមឲ្យបានកាន់តែច្រើនពីកសិករឱ្យអស់ពីលទ្ធភាព និងស្របតាមតម្លៃទីផ្សារ។ បន្ថែមពីនេះ លោកជំទាវ បានអំពាវនាវអ្នកទិញទាំងអស់ មេត្តាជួយទិញតម្លៃសមរម្យពីប្រជាកសិករផងដែរ៕