សេវាសង្គ្រោះបន្ទាន់ក្នុងតំបន់បាននិយាយនៅថ្ងៃចន្ទ (១៨ សីហា) នេះថា ចំនួនអ្នកស្លាប់ដោយសារហេតុការណ៍ផ្ទុះដែលមិនទាន់រកមូលហេតុឃើញ កាលពីសប្តាហ៍មុន នៅឯរោងចក្រផលិតមួយកន្លែងក្នុងតំបន់ Ryazan របស់ប្រទេសរុស្ស៊ី បានកើនឡើងដល់យ៉ាងហោចណាស់ ២០នាក់ បានស្លាប់ និងប្រមាណជា ១៣៤នាក់ ផ្សេងទៀតបានរងរបួស។

លោក Pavel Malkov អភិបាលតំបន់ Ryazan ដែលស្ថិតនៅភាគអាគ្នេយ៍ទីក្រុងមូស្គូ បាននិយាយកាលពីថ្ងៃសុក្រសប្ដាហ៍មុនថា ឧបទ្ទវហេតុផ្ទុះនេះត្រូវបានបង្កឡើង នៅពេលអគ្គិភ័យបានឆាបឆេះនៅផ្នែកខាងក្នុងរោងជាងរបស់រោងចក្រនេះ។

អភិបាលតំបន់រូបនេះបន្តថា គេមិនទាន់ដឹងច្បាស់ឡើយពីមូលហេតុពិតប្រាកដ ដែលបង្កឱ្យមានអគ្គិភ័យនោះ ឬថាតើរោងចក្រនេះផលិតអ្វីឱ្យប្រាកដ។ ប្រភពពីមន្រ្តីរបស់រុស្ស៊ី មិនបានផ្តល់ព័ត៌មានលម្អិតអ្វីឡើយ ដោយគ្រាន់តែនិយាយថា កិច្ចខិតខំប្រឹងប្រែងស្វែងរក និងព្យាបាលអ្នករបួសនៅតែបន្ត៕