យោធារបស់អ៊ីស្រាអែល កាលពីថ្ងៃអាទិត្យ (១៧ សីហា) បានបង្កើនការវាយប្រហារលើទីក្រុងហ្កាហ្សា ជាផ្នែកនៃការពង្រីកប្រតិបត្តិការសឹករបស់ខ្លួន ក្នុងគោលបំណងដណ្តើមយកទីតាំងដ៏សំខាន់ចុងក្រោយដែលមានប្រជាជនរស់នៅកុះករក្នុងតំបន់ហ៊ុព័ទ្ធនេះ ដោយបង្ខំឱ្យប្រជាជនប៉ាឡេស្ទីនរាប់ម៉ឺននាក់ដែលអត់ឃ្លាន ត្រូវបង្ខំចិត្តរត់ភៀសខ្លួនជាថ្មីម្តងទៀត។

សង្កាត់នានានៃទីក្រុងហ្កាហ្សា គឺ Zeitoun, Sabra, Remal និង Tuffah ជាពិសេស បានទទួលរងការទម្លាក់គ្រាប់បែករបស់អ៊ីស្រាអែល កាន់តែខ្លាំងក្នុងប៉ុន្មានថ្ងៃថ្មីៗ ខណៈអ្នកនាំពាក្យរបស់ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ OCHA បាននិយាយថា ផែនការរបស់អ៊ីស្រាអែល ក្នុងការបណ្តេញប្រជាជនប៉ាឡេស្ទីនទៅកាន់ភាគខាងត្បូងតំបន់ហ្កាហ្សានេះ នឹងបង្កើនទុក្ខវេទនាឈឺចាប់សម្រាប់ពួកគេកាន់តែអាក្រក់ឡើង។

ប្រជាជនរាប់ពាន់គ្រួសារបានភៀសខ្លួនចេញពីសង្កាត់ Zeitoun ជាទីដែលការវាយប្រហារជាបន្តបន្ទាប់ច្រើនថ្ងៃ បានធ្វើឱ្យសង្កាត់នេះត្រូវបំផ្លិចបំផ្លាញខ្ទេចខ្ទី។ មនុស្សជាច្រើនសិបនាក់បានបន្តស្លាប់កាលពីថ្ងៃអាទិត្យ នៅពេលការវាយប្រហារតាមអាកាសរបស់អ៊ីស្រាអែល ត្រូវចំមន្ទីរពេទ្យ al-Ahli Arab ក្នុងទីក្រុងហ្កាហ្សា។

កាលពីថ្ងៃអាទិត្យដដែលនេះ យោធាអ៊ីស្រាអែលបាននិយាយថា តង់ និងឧបករណ៍សម្រាប់ដំឡើងទីជម្រកបណ្ដោះអាសន្ន នឹងត្រូវផ្តល់ជូនដល់ជនប៉ាឡេស្ទីនដែលជម្លៀសខ្លួនជាច្រើនដងក្នុងសង្រ្គាមដ៏ឃោរឃៅ ២២ខែមកនេះ នៅក្នុងជម្លោះដ៏បង្ហូរឈាមបំផុតមួយដែលត្រូវអង្គការសិទ្ធិមនុស្សជាច្រើនហៅថាជាអំពើប្រល័យពូជសាសន៍៕