ទីភ្នាក់ងារសារព័ត៌មានហ្ស៊កដានី (JNA) បានរាយការណ៍ថា មន្ទីរពេទ្យបណ្តោះអាសន្នថ្មីរបស់ប្រទេសហ្ស៊កដានី បានចាប់ផ្តើមដំណើរការ នៅតំបន់ហ្កាហ្សា កាលពីថ្ងៃអាទិត្យ ដោយផ្តល់សេវាវេជ្ជសាស្រ្ត និងព្យាបាលដែលមានឯកទេសជាច្រើន ជាផ្នែកមួយនៃការបន្តគាំទ្ររបស់ព្រះរាជាណាចក្រនេះសម្រាប់វិស័យសុខាភិបាល នៅក្នុងទឹកដីប៉ាឡេស្ទីន។

មេបញ្ជាការនៃមន្ទីរពេទ្យហ្ស៊កដានី Field Hospital Gaza/83 បាននិយាយថា ភ្លាមៗនោះ ក្រុមគ្រូពេទ្យ បានបង្កើតគ្លីនិក និងបំពាក់ឧបករណ៍ចាំបាច់ ដើម្បីចាប់ផ្តើមប្រតិបត្តិការ។

មន្ទីរពេទ្យនេះ មានផ្នែកជំងឺទូទៅ សម្ភព និងរោគស្ត្រី វះកាត់ឆ្អឹង ទន្តសាស្រ្ត ជំងឺកុមារ ការព្យាបាលជំងឺ  សរីរាង្គខាងក្នុង និងការថែទាំមុនការវះកាត់។

សារព័ត៌មាន JNA បានបន្ថែមថា ប្រជាជនហ្កាហ្សា បានសម្តែងការពេញចិត្តចំពោះជំនួយដែលកំពុងបន្តរបស់ប្រទេសហ្ស៊កដានី ដោយកត់សម្គាល់ថា ជំនួយផ្នែកវេជ្ជសាស្រ្ត និងមនុស្សធម៌ដែលផ្តល់តាមរយៈការទម្លាក់តាមអាកាស និងក្បួនរថយន្ត បានជួយសម្រាលការឈឺចាប់របស់ពួកគេ ចំពេលការលុកលុយរបស់អ៊ីស្រាអែល នៅតែបន្ត។