ទូរទស្សន៍រដ្ឋ នៅថ្ងៃចន្ទ (ទី១៨ ខែសីហា) នេះ បានរាយការណ៍ថា សហភាពមីយ៉ាន់ម៉ានឹងរៀបចំដំណាក់កាលដំបូងនៃការបោះឆ្នោតសកលរបស់ខ្លួន នៅថ្ងៃទី២៨ ខែធ្នូ ដោយបង្ហាញពីផែនទីបង្ហាញផ្លូវ សម្រាប់ការបោះឆ្នោតលើកដំបូង នៅក្នុងប្រទេសដែលហែកហួរដោយសង្រ្គាម ក្នុងរយៈពេលជិត ៥ឆ្នាំ ជាដំណើរការដែលត្រូវបានរិះគន់រួចហើយថា ជាការក្លែងបន្លំ។

បើយោងតាមការប្រកាសនៅលើទូរទស្សន៍ MRTV បានឲ្យដឹងថា គណៈកម្មាធិការរៀបចំការបោះឆ្នោតសហភាពមីយ៉ាន់ម៉ា បានប្រាប់ថា កាលបរិច្ឆេទ សម្រាប់ដំណាក់កាលបន្តបន្ទាប់នៃការបោះឆ្នោត ដែលអាជ្ញាធរគ្រោងនឹងរៀបចំនៅខែធ្នូ និងខែមករា សម្រាប់ហេតុផលសុវត្ថិភាព នឹងត្រូវបានប្រកាសនៅពេលក្រោយ។

យោងតាមប្រព័ន្ធផ្សព្វផ្សាយរដ្ឋ បានឲ្យដឹងថា គណបក្សនយោបាយសរុបចំនួន ៥៥ បានចុះបញ្ជី សម្រាប់ការបោះឆ្នោត ដែលក្នុងនោះ ៩គណបក្ស គ្រោងនឹងប្រកួតប្រជែងនៅទូទាំងប្រទេស។ សារព័ត៌មាន The Global New Light of Myanmar បានរាយការណ៍កាលពីដើមខែនេះថា «គណបក្សចំនួន ៦ កំពុងស្ថិតក្រោមការត្រួតពិនិត្យ ដើម្បីអនុម័ត និងចុះបញ្ជី»។

ប៉ុន្តែដោយក្រុមប្រឆាំងប្រឆាំងរបបយោធា ទាំងត្រូវបានរារាំងមិនឲ្យឈរឈ្មោះ ឬបដិសេធមិនចូលរួមនោះ ការបោះឆ្នោតត្រូវបានច្រានចោលដោយរដ្ឋាភិបាលលោកខាងលិចថា ជាដំណើរការមួយ ដើម្បីពង្រឹងអំណាចរបស់ក្រុមឧត្តមសេនីយ៍ ហើយវាត្រូវបានគេរំពឹងថា នឹងគ្របដណ្ដប់ដោយអ្នកតំណាងរបស់យោធា។

គួរបញ្ជាក់ថា សហភាពមីយ៉ាន់ម៉ាបានធ្លាក់ចូលទៅក្នុងអំពើហិង្សាចាប់តាំងពីរដ្ឋប្រហារឆ្នាំ២០២១ ដែលបានទម្លាក់រដ្ឋាភិបាលស៊ីវិលជាប់ឆ្នោតដឹកនាំដោយលោកស្រី Aung San Suu Kyi ដែលបានទទួលពានរង្វាន់ណូបែល ហើយក្រុមឧត្តមសេនីយ៍ដែលកំពុងកាន់អំណាចដឹកនាំដោយមេយោធា លោក Min Aung Hlaing បានប្រឈមនឹងការតស៊ូយ៉ាងខ្លាំងក្លាពីក្រុមប្រដាប់អាវុធ៕