ប្រធានគណៈកម្មការប្លុកអឺរ៉ុប លោកស្រី Ursula von der Leyen បានប្រកាសកាលពីថ្ងៃអាទិត្យ (១៧ សីហា) ថា កញ្ចប់ទណ្ឌកម្មទី១៩ ថ្មីបំផុតរបស់សហភាពអឺរ៉ុប ប្រឆាំងនឹងរុស្ស៊ី ត្រូវកំណត់ថានឹងបង្ហាញខ្លួននៅដើមខែកញ្ញា ដ៏ឆាប់ខាងមុខនេះ។

ថ្លែងក្នុងសន្និសីទរួមគ្នាជាមួយលោកប្រធានាធិបតីអ៊ុយក្រែន Volodymyr Zelenskyy នៅទីក្រុងប្រ៊ុចសែល លោកស្រី Von der Leyen បាននិយាយថា «ដរាបណាការបង្ហូរឈាមនៅអ៊ុយក្រែននៅតែបន្ត អឺរ៉ុបនឹងរក្សាទាំងផ្លូវការទូត និងជាពិសេសសម្ពាធសេដ្ឋកិច្ចលើរុស្ស៊ី»។ លោកស្រីបន្តថា សហភាពអឺរ៉ុបបានអនុម័តកញ្ចប់ទណ្ឌកម្មទី១៨ រួចមកហើយមកទល់ពេលនេះ ហើយបច្ចុប្បន្នកំពុងពន្លឿនការរៀបចំកញ្ចប់ទណ្ឌកម្មទី១៩ ដែលអាចមកដល់ឆាប់ៗនៅដើមខែកញ្ញាខាងមុខនេះ។

លោកស្រីបានបន្ថែមថា សហភាពអឺរ៉ុបនឹងបន្តកំណត់គោលដៅសេដ្ឋកិច្ចសង្គ្រាមរបស់រុស្ស៊ី «ដើម្បីរុញលោកប្រធានាធិបតីរុស្ស៊ី Vladimir Putin ទៅកាន់តុចរចា»។ ប្រមុខគណៈកម្មការអឺរ៉ុបរូបនេះសង្កត់ធ្ងន់ថា វិធានការមានស្រាប់ បានបង្ហាញប្រសិទ្ធភាពប្រឆាំងនឹងកិច្ចប្រឹងប្រែងសង្រ្គាមរបស់លោក Putin ដោយគូសបញ្ជាក់ថា ទ្រព្យសម្បត្តិបង្កករបស់រុស្ស៊ី ត្រូវបានបញ្ជូនបន្តទៅគាំទ្រអ៊ុយក្រែនរួចរាល់ហើយ។

ប្លុកអឺរ៉ុប កាលពីថ្ងៃទី១៨ ខែកក្កដា បានយល់ព្រមលើកញ្ចប់ទណ្ឌកម្មទី១៨ ចុងក្រោយបំផុតមួយរួចមកហើយ ប្រឆាំងនឹងរុស្ស៊ី ជុំវិញសង្រ្គាមអ៊ុយក្រែន។ អឺរ៉ុបប្តេជ្ញាបង្កើនសម្ពាធសេដ្ឋកិច្ចលើរុស្ស៊ី ដោយសារក្រុងមូស្គូនៅតែបន្តបដិសេធបទឈប់បាញ់នៅអ៊ុយក្រែន និងបង្កើនការវាយប្រហារមិនឈប់៕