​បាល់ទាត់៖ អតីត​ខ្សែប្រយុទ្ធ​ជម្រើសជាតិ​កាណាដា​ Marcus Haber ​បាន​សម្ដែង​នូវ​ក្ដី​រីករាយ ក្រោយ​បាន​ចូលរួម​ជាមួយ​ក្រុម​ព្រះខ័ន​រាជ​ស្វាយរៀង ដែលជា​ក្លិប​លំដាប់​កំពូល​មួយនៃ​ក្របខណ្ឌ​លី​គ​កំពូល​កម្ពុជា។​

Marcus Haber ​បាន​បញ្ជាក់ថា នេះ​គឺជា​ការផ្លាស់​ប្ដួ​រ​មួយ​ដ៏​ងាយស្រួល បន្ទាប់ពី​មានការ​ជជែក​ជាមួយ​គ្រូបង្វឹក​លោក​ Conor Nestor ​កាល​ពី​ចុងរដូវ​កាល​កន្លងទៅ ហើយក៏​ជា​រឿង​ដ៏​មានន័យ​សម្រាប់​ខ្លួន​ផងដែរ ដែល​ទទួលបាន​ការចាប់​អារម្មណ៍​ពី​គ្រូបង្វឹក និង​បាន​ក្លាយជា​សមាជិក​ក្រុមព្រះ​ខ័ន​រាជ​ស្វាយរៀង។​ ​អតីត​សមាជិក​ក្រុម​វិសាខា​រូបនេះបាន​រំ​លឹ​ក​ពី​ការប្រកួត​ ជាមួយ​ព្រះខ័ន​រាជ​ស្វាយរៀងកាលពី​ឆ្នាំមុនគឺជា​ការប្រកួត​ដ៏​លំបាក ដែល​ជួប​ក្រុម​មួយ​មានការ​រៀបចំ​បានល្អ និង​គ្រូបង្វឹក​ដ៏​ល្អ។ នេះ​គឺជា​ហេតុផល​មួយ​ដ៏​រូបគេសម្រេចចិត្ត​ចូលរួម​ជាមួយ​ក្រុម​មាន​មូលដ្ឋាន​នៅ​ខេត្តស្វាយរៀង ដោយ​មិន​ស្ទាក់ស្ទើរ។​

​ខ្សែប្រយុទ្ធ​វ័យ ៣២​ឆ្នាំ​ដដែលបានបង្ហាញ​ចំណាប់អារម្មណ៍ និង​ចូលចិត្តចំពោះ​ប្រព័ន្ធ​លេង និង​របៀប​លេង​របស់​ព្រះខ័ន​រាជ​ស្វាយរៀង ដែលជា​បរិយាកាស​អាជីព​មួយ។ ដូច្នេះ​ Marcus Haber ​ប្ដេជ្ញា​ថានឹង​ខិតខំ​ឲ្យ​អស់ពី​សមត្ថភាព ដើម្បី​ជួយ​ក្លិបឆ្ពោះទៅ​សម្រេច​គោលដៅ​ក្នុង​រដូវ​កាល​ថ្មី​នេះ គឺ​ការ​ដណ្ដើមពាន​លី​គ​កំពូល​កម្ពុជាឆ្នាំ​២០២២។​ ​សូម​រំ​លឹ​កថា​ Marcus Haber ​មានបទពិសោធន៍​ជោគជាំ​ក្នុង​អាជីព​នៅ​ប្រទេស​កំណើត និង​អឺរ៉ុប ពិសេស​រូបគេក៏​ធ្លាប់​ចូលរួម​ជាមួយ​ក្លិប​ West Bromwich Albion ​នៃ​ក្របខណ្ឌ​លី​គ​កំពូល​អង់គ្លេស​ English Premier League ​កាលពី​ឆ្នាំ​២០១០-២០១១ ផងដែរ។​ Marcus Haber ​បាន​ជាប់​ជម្រើសជាតិ​យុវជន​កាណាដាតាំងពី​ឆ្នាំ​២០០៥ មុន​វិវត្តន៍ឡើង​លេង​ក្រុម​ធំនៅ​ឆ្នាំ​២០១០៕

​អត្ថបទ៖ លី ឈុន​ឡា