បាល់ទាត់៖ លោក ទេព ឡុងរចនា អ្នកចាត់ការក្រុមកងយោធពលខេមរភូមិន្ទបានសម្ដែងការគាំទ្រ ចំពោះការធ្វើកំណែទម្រង់ក្របខណ្ឌលីគកំពូលកម្ពុជានារដូវកាលថ្មី ដែលនឹងជំរុញឲ្យមានការប្រកួតប្រជែងកាន់តែខ្លាំង ខណៈក្រុមខ្លួនក៏ត្រូវត្រៀម និងរៀបចំឲ្យបានខ្លាំងដូចគ្នា បើមិនដូច្នោះអាចធ្លាក់ទៅលេងលីគទី២ នាឆ្នាំក្រោយ។
ការគូសបញ្ជាក់នេះ បន្ទាប់ពីសហព័ន្ធកីឡាបាល់ទាត់កម្ពុជាបានបង្កើតក្រុមហ៊ុនលីគបាល់ទាត់កម្ពុជា ដើម្បីធ្វើការកែទម្រង់ការប្រកួតលីគកំពូលកម្ពុជាឲ្យកាន់តែស្ដង់ដារ និងរីកចម្រើនបន្ថែមទៀតឆ្ពោះទៅរកភាពស្មើមុខមាត់លើឆាកអន្ដរជាតិ ពិសេសលក្ខខណ្ឌមួយចំនួនដែលជួយគាំទ្រដល់ការត្រៀមខ្លួនធ្វើម្ចាស់ផ្ទះស៊ីហ្គេមឆ្នាំ២០២៣។ អ្នកចាត់ការក្រុមដដែលបន្ដថា ជាមួយកំណែទម្រង់នេះ ក្លិបនីមួយៗត្រូវត្រៀមខ្លួនឲ្យបានខ្លាំងដើម្បីបង្កើនការប្រកួតប្រជែងផង និងទាក់ទាញទស្សនិកជនផង។ ដូច្នេះក្រុមកងយោធពលខេមរភូមិន្ទក៏បានរុះរើកីឡាករមួយចំនួន ហើយសម្រិតសម្រាំងមកវិញនូវធនធានកីឡាករល្អៗ ទាំងយុវជន និងកីឡាករបរទេសដើម្បីបង្កើនការប្រកួតប្រជែងថ្មីនេះផងដែរ។
គួរដឹងថា កាលពីរដូវកាលឆ្នាំ២០២១ កន្លងទៅ ក្រុមកងយោធពលខេមរភូមិន្ទពុំបានសម្រេចលទ្ធផលគាប់ប្រសើរនោះទេ ក្រោមការដឹកនាំរបស់លោក Lee Tae Hoon ដោយបញ្ចប់ត្រឹមចំណាត់ថ្នាក់លេខ៧ នៃលីគកំពូលកម្ពុជា និងធ្លាក់ត្រឹមវគ្គ ១៦ក្រុមចុងក្រោយនៃពានរង្វាន់សម្ដេចតេជោ ហ៊ុន សែន-ថ្នាក់ជាតិក្រោយចាញ់ក្រុមអគ្គិសនីកម្ពុជា ៤-០។ ការណ៍នេះនាំឲ្យក្លិបសម្រេចបញ្ចប់កិច្ចសន្យាជាមួយលោក Lee Tae Hoon មុនការកំណត់ ហើយតែងតាំងលោក ទេព ឡុងរចនា មកដឹកនាំជំនួសវិញ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
