អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei នៅថ្ងៃចន្ទ (ទី១៨ ខែសីហា) នេះ បានប្រាប់ប្រព័ន្ធផ្សព្វផ្សាយរដ្ឋថា អ៊ីរ៉ង់នឹងបន្តការពិភាក្សាជាមួយក្រុមឃ្លាំមើលនុយក្លេអ៊ែររបស់អង្គការសហប្រជាជាតិ ហើយភាគីទាំង២ ប្រហែលជានឹងមានការចរចាជុំផ្សេងទៀត នៅក្នុងប៉ុន្មានថ្ងៃខាងមុខនេះ។

មន្ត្រីត្រួតពិនិត្យរបស់ទីភ្នាក់ងារថាមពលបរមាណូអន្តរជាតិ (IAEA) មិនអាចចូលទៅកាន់ទីតាំងនុយក្លេអ៊ែររបស់អ៊ីរ៉ង់បានទេ ចាប់តាំងពីអ៊ីស្រាអែល និងសហរដ្ឋអាមេរិក បានទម្លាក់គ្រាប់បែក ក្នុងអំឡុងពេលមានសង្គ្រាមរយៈពេល ១២ថ្ងៃ កាលពីខែមិថុនា បើទោះបីជាប្រធាន IAEA លោក Rafael Grossi បានបញ្ជាក់ថា ការត្រួតពិនិត្យនៅតែជាអាទិភាពចម្បងរបស់លោក។

លោក Baghaei បាននិយាយថា៖ «យើងមានកិច្ចពិភាក្សា (ជាមួយ IAEA) កាលពីសប្តាហ៍មុន។ ការពិភាក្សាទាំងនេះ នឹងបន្ត ហើយនឹងមានការពិភាក្សាជុំផ្សេងទៀត រវាងប្រទេសអ៊ីរ៉ង់ និងទីភ្នាក់ងារនេះ ប្រហែលជានៅប៉ុន្មានថ្ងៃខាងមុខ»។

គួរបញ្ជាក់ថា ទីក្រុងតេអេរ៉ង់បានចោទប្រកាន់ IAEA ថា បានបើកផ្លូវប្រកបដោយប្រសិទ្ធភាព ដើម្បីឲ្យមានការវាយប្រហារពីសំណាក់អ៊ីស្រាអែល-អាមេរិក ដោយការចេញរបាយការណ៍កាលពីថ្ងៃទី៣១ ខែឧសភា ដែលនាំឲ្យក្រុមប្រឹក្សាភិបាលមាន ៣៥ប្រទេសរបស់ IAEA ប្រកាសថា អ៊ីរ៉ង់បំពានលើកាតព្វកិច្ចមិនរីកសាយភាយ។

សាធារណៈរដ្ឋឥស្លាមមួយនេះ បានបដិសេធជាយូរមកហើយ ចំពោះការសង្ស័យរបស់លោកខាងលិច ដែលថា ខ្លួនមានកិច្ចប្រឹងប្រែងសម្ងាត់ ក្នុងការអភិវឌ្ឍសមត្ថភាពអាវុធនុយក្លេអ៊ែរ ដោយបញ្ជាក់ថា ខ្លួននៅតែប្តេជ្ញាចិត្តចំពោះសន្ធិសញ្ញាមិនរីកសាយភាយអាវុធ ដែលកំណត់ការប្រើប្រាស់ដោយសន្តិវិធីនៃថាមពលបរមាណូ សម្រាប់ប្រទេសហត្ថលេខី។

កាលពីខែមុន អ៊ីរ៉ង់បានអនុម័តច្បាប់មួយដែលសភាអនុម័តផ្អាកកិច្ចសហប្រតិបត្តិការជាមួយ IAEA។ ច្បាប់នេះចែងថា រាល់ការត្រួតពិនិត្យនាពេលអនាគតលើទីតាំងនុយក្លេអ៊ែរអ៊ីរ៉ង់ ត្រូវការការយល់ព្រមពីក្រុមប្រឹក្សាសន្តិសុខជាតិជាន់ខ្ពស់របស់ទីក្រុងតេអេរ៉ង់៕