វិមានក្រឹមឡាំងបានឲ្យដឹងថា ប្រធានាធិបតីរុស្ស៊ីលោក Vladimir Putin នៅថ្ងៃចន្ទ (ទី១៨ ខែសីហា) នេះ បាននិយាយប្រាប់សមភាគីអាហ្វ្រិកខាងត្បូងរបស់លោក គឺលោក Cyril Ramaphosa អំពីលទ្ធផលនៃជំនួបកំពូល កាលពីសប្តាហ៍មុន ជាមួយប្រធានាធិបតីអាមេរិក លោក Donald Trump។

សេចក្តីថ្លែងការណ៍ពីការិយាល័យរបស់ប្រធានាធិបតី បានបញ្ជាក់ថា លោក Putin បានជជែកជាមួយសមភាគីរបស់លោកតាមទូរសព្ទ ហើយលោក Ramaphosa បានបង្ហាញការគាំទ្រដល់កិច្ចប្រឹងប្រែងការទូតដែលមានគោលបំណងស្វែងរកដំណោះស្រាយដោយសន្តិវិធី ចំពោះសង្រ្គាមអ៊ុយក្រែនដែលកំពុងបន្តមាន។

ហើយជាមួយគ្នានេះ សេចក្តីថ្លែងការណ៍នោះបានបន្ថែមថា៖ «ការប្តេជ្ញាចិត្តទៅវិញទៅមក ក្នុងការលើកកម្ពស់បន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរុស្ស៊ី-អាហ្វ្រិកខាងត្បូង និងកិច្ចសហប្រតិបត្តិការជិតស្និទ្ធ រវាងប្រទេសទាំង២ នៅលើវេទិកាអន្តរជាតិ ត្រូវបានបញ្ជាក់អះអាង»។

លោក Putin និងលោក Trump បានបើកកិច្ចប្រជុំមួយ កាលពីថ្ងៃសុក្រចុងសប្ដាហ៍កន្លងមក នៅទីក្រុង Anchorage ជាទីក្រុងធំបំផុតនៃរដ្ឋ Alaska របស់សហរដ្ឋអាមេរិក ដែលនេះជាជំនួបលើកដំបូង រវាងមេដឹកនាំក្នុងតំណែងរបស់សហរដ្ឋអាមេរិក និងរុស្ស៊ី ចាប់តាំងពីមានការផ្ទុះឡើងនូវសង្រ្គាម នៅអ៊ុយក្រែន ក្នុងខែកុម្ភៈ ឆ្នាំ២០២២។

ប្រព័ន្ធផ្សព្វផ្សាយរដ្ឋរុស្ស៊ី ក្នុងនោះរួមមានទាំងសារព័ត៌មាន Tass ផងដែរ បានរាយការណ៍ថា លោក Putin នឹងបន្តការសន្ទនាជាអន្តរជាតិតាមទូរសព្ទជាបន្តបន្ទាប់ ដើម្បីជូនដំណឹងដល់សមភាគីរបស់លោក អំពីលទ្ធផលនៃកិច្ចប្រជុំកំពូល នៅ Alaska៕