នៅមុនកិច្ចពិភាក្សាជាមួយលោក Donald Trump នាថ្ងៃចន្ទ (ទី១៨ ខែសីហា) នេះ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ប្រទេសរុស្ស៊ីមិនគួរត្រូវបានផ្ដល់ «រង្វាន់» សម្រាប់ការលុកលុយឈ្លានពានរបស់ប្រទេសនេះនោះឡើយ បន្ទាប់ពីមេដឹកនាំសហរដ្ឋអាមេរិក បានជំរុញឲ្យអ៊ុយក្រែនព្រមធ្វើសម្បទាន ជាថ្នូរនឹងការទទួលបានសន្តិភាព។

កិច្ចពិភាក្សាដែលមេដឹកនាំអឺរ៉ុប ក៏នឹងចូលរួមដែរ គឺធ្វើឡើងបន្ទាប់ពីមានជំនួបកំពូល កាលពីថ្ងៃសុក្រចុងសប្ដាហ៍កន្លងមក រវាងលោក Trump និងប្រធានាធិបតីរុស្ស៊ី លោក Vladimir Putin នៅរដ្ឋ Alaska ដែលបានបញ្ចប់ទៅដោយមិនអាចបង្កើតបាននូវបទឈប់បាញ់ នៅក្នុងសង្រ្គាមរយៈពេលជិត ៣ឆ្នាំកន្លះ។

លោក Trump ដែលបានទម្លាក់ការទទូចរបស់លោក ជុំវិញបទឈប់បាញ់ ដើម្បីគាំទ្រដល់កិច្ចព្រមព្រៀងសន្តិភាពចុងក្រោយបន្ទាប់ពីបានជួបជាមួយលោក Putin បាននិយាយកាលពីថ្ងៃអាទិត្យថា លោក Zelenskyy អាចបញ្ចប់សង្រ្គាមដែល «ស្ទើរតែភ្លាមៗ ប្រសិនបើលោកចង់» ប៉ុន្តែសម្រាប់អ៊ុយក្រែន «មិនមានការទទួលបានមកវិញ» នូវតំបន់គ្រីម៉ា និង «មិនអាចដំណើរការការស្នើសុំចូលជាសមាជិករបស់អង្គការណាតូបានទេ»។

ទាំងទីក្រុងគីវ និងមេដឹកនាំអឺរ៉ុប បានព្រមានប្រឆាំងនឹងការធ្វើសម្បទាននយោបាយ និងដែនដីឲ្យដល់រុស្ស៊ី ដែលការវាយលុករបស់ប្រទេសនេះ លើអ៊ុយក្រែន តាំងពីខែកុម្ភៈ ឆ្នាំ២០២២ បានបណ្តាលឲ្យមនុស្សរាប់ម៉ឺននាក់ស្លាប់។

តាមរយៈការបង្ហោះ នៅលើបណ្ដាញសង្គម Facebook នាព្រឹកថ្ងៃចន្ទនេះ លោក Zelenskyy បានសង្កត់ធ្ងន់ថា៖ «ប្រទេសរុស្ស៊ីមិនគួរត្រូវបានផ្តល់រង្វាន់ សម្រាប់ការចូលរួមក្នុងសង្គ្រាមនោះឡើយ ហើយវាគឺជាទីក្រុងមូស្គូទៅវិញទេដែលត្រូវតែត្រូវបានប្រាប់ថា សូមបញ្ឈប់»៕