នៅថ្ងៃចន្ទនេះ ក្រុមជួយសង្រ្គោះ កំពុងព្យាយាមស្វែងមនុស្សជាង ១៥០នាក់ ដែលកំពុងបាត់ខ្លួននៅតំបន់ភាគពាយ័ព្យប្រទេសប៉ាគីស្ថាន ដែលរងការវាយប្រហារដោយបំណាក់ដី និងទឹកជំនន់ដ៏គំហុកកាលពីថ្ងៃសុក្រ ។

ភ្លៀងធ្លាក់ខ្លាំងបង្កឲ្យកើតមានទឹកជំនន់សម្លាប់មនុស្ស ៣៥០នាក់ និងបំផ្លិចបំផ្លាញផ្ទះសម្បែងប្រជាពលរដ្ឋរាប់រយខ្នង ។

ភាគច្រើននៃមនុស្សស្លាប់ប្រហែល ៣១៧នាក់ ត្រូវបានរាយការណ៍នៅខេត្ត Khyber Pakhtunkhwa ជាទីដែលគេរំពឹងថា ភ្លៀងធ្លាក់ខ្លាំងនឹងបន្តបង្អុរចុះខ្លាំងក្លាបន្ថែមទៀតក្នុងរយៈពេលប៉ុន្មានថ្ងៃខាងមុខ ដែលអាចបង្កឲ្យមានបំណាក់ដីបាក់សង្កត់លើផ្ទះសម្បែងប្រជាពលរដ្ឋបន្ថែមទៀត ។

 យោងតាមការអះអាងរបស់ក្រុមអាជ្ញាធរបានឲ្យដឹងថា មនុស្សជាង ១៥០នាក់ កំពុងបាត់ខ្លួននៅស្រុក Buner ជាទីដែលមនុស្សយ៉ាងហោច ២០៨នាក់ ត្រូវបានសម្លាប់ ហើយភូមិ ១០ក្នុងចំណោមភូមិ ១២កន្លែង ត្រូវបានកប់ដោយផ្នែកក្រោមបំណាក់ដី ។

 លោក Asfandyar Khattak គឺជាប្រធានអាជ្ញាធរគ្រប់គ្រងគ្រោះមហន្តរាយខេត្ត Khyber Pakhtunkhwa និយាយថា ជនរងគ្រោះអាចនឹងកប់ក្រោមកម្ទេចកម្ទីផ្ទះសម្បែងរបស់ពួកគេ ឬត្រូវទឹកជំនន់ហូរនាំយកទៅ ។

 លោក Khattak បន្តថា ដោយឡែកនៅស្រុក Shangla មនុស្សរាប់សិបនាក់ ត្រូវបានរាយការណ៍ថាបាត់ខ្លួនផងដែរ ។

 អ្នកនាំពាក្យទីភ្នាក់ងារជួយសង្រ្គោះខេត្ត Khyber Pakhtunkhwa និយាយថា ក្រុមការងារជួយសង្រ្គោះប្រហែល ២ពាន់នាក់ បានចុះប្រតិបត្តិការជួយសង្រ្គោះនៅតាមបណ្តាស្រុកចំនួន ៩ ជាទីដែលភ្លៀងធ្លាក់នៅតែបន្តរារាំងដល់កិច្ចខិតខំជួយសង្រ្គោះរបស់ពួកគេ ៕