ប្រភពពីមន្រ្តីរបស់អេហ្ស៊ីប បាននិយាយកាលពីថ្ងៃចន្ទ (១៨ សីហា) ថា ក្រុមសកម្មប្រយុទ្ធ ហាម៉ាស បានយល់ព្រមលើសំណើបទឈប់បាញ់រយៈពេល ៦០ថ្ងៃ ជាមួយអ៊ីស្រាអែល ដែលរួមមានការវិលត្រឡប់នៃចំណាប់ថ្នូរពាក់កណ្តាលដែលត្រូវឃុំខ្លួននៅតំបន់ហ្កាហ្សា និងការដោះលែងអ្នកទោសប៉ាឡេស្ទីនមួយចំនួនពីពន្ធនាគារអ៊ីស្រាអែល។

មន្ត្រីជាន់ខ្ពស់ក្រុមហាម៉ាស លោក Basem Naim បានបញ្ជាក់ពីការយល់ព្រមរបស់ក្រុមនេះ នៅលើបណ្ដាញសង្គមហ្វេសប៊ុក ហើយក្រុមហាម៉ាសផ្ទាល់ក៏បាននិយាយថា បក្សពួកប៉ាឡេស្ទីនផ្សេងទៀត បានជូនដំណឹងដល់អ្នកសម្រុះសម្រួលអំពីការយល់ព្រមរបស់ពួកគេផងដែរ។

ពុំទាន់មានការឆ្លើយតបផ្លូវការរបស់អ៊ីស្រាអែល ចំពោះសំណើរបស់ក្រុមហាម៉ាស នេះនៅឡើយទេ ប៉ុន្តែមន្ត្រីអ៊ីស្រាអែលម្នាក់បានបញ្ជាក់ថា សំណើត្រូវបានទទួលយកហើយ ជាអ្វីដែលអេហ្ស៊ីប និងកាតា បាននិងកំពុងសម្រុះសម្រួលរវាងភាគីជម្លោះ ដោយមានការគាំទ្រពីសហរដ្ឋអាមេរិក។

ប្រភពពីមន្រ្តីអេហ្ស៊ីបនោះបានបញ្ជាក់ថា សំណើដែលទទួលយកដោយក្រុមហាម៉ាសនេះ រួមមានការផ្អាកប្រតិបត្តិការយោធាអ៊ីស្រាអែលរយៈពេល ៦០ថ្ងៃ និងបានគូសបញ្ជាក់ពីក្របខណ្ឌសម្រាប់កិច្ចព្រមព្រៀងដ៏ទូលំទូលាយមួយដើម្បីបញ្ចប់ជម្លោះហ្កាហ្សា ដ៏បង្ហូរឈាមជិត ២ឆ្នាំមកនេះ។ ប្រភពដែលដឹងពីការចរចាបាននិយាយថា សំណើចុងក្រោយនេះស្រដៀងនឹងផែនការមុន ដែលដាក់ចេញដោយប្រេសិតពិសេសអាមេរិក លោក Steve Witkoff ក្នុងអ្វីដែលអ៊ីស្រាអែលធ្លាប់បានទទួលយករួចទៅហើយ៕