ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅថ្ងៃអង្គារ (១៩ សីហា) នេះបន្ទាប់ពីកិច្ចប្រជុំជាមួយលោកប្រធានាធិបតីអាមេរិក Donald Trump និងមេដឹកនាំអឺរ៉ុបថា ការធានាសន្តិសុខសម្រាប់ទីក្រុងគីវ ទំនងជានឹងត្រូវបានសម្រេចក្នុងរយៈពេល ១០ថ្ងៃដ៏ឆាប់ខាងមុខនេះ។

ថ្លែងនៅក្នុងសន្និសីទសារព័ត៌មានបន្ទាប់ពីកិច្ចប្រជុំ លោក Zelenskiy បាននិយាយថា «ការធានាសន្តិសុខប្រហែលជានឹងត្រូវ 'បើកបង្ហាញ' ដោយដៃគូអ៊ុយក្រែន ហើយព័ត៌មានលម្អិតកាន់តែច្រើននឹងលេចចេញមក»។ លោកបន្តថា «ទាំងអស់នេះនឹងត្រូវបង្ហាញជាផ្លូវការលើឯកសារក្នុងពេល ១០ថ្ងៃបន្ទាប់»។

លោក Trump បានប្រាប់លោក Zelenskiy កាលពីថ្ងៃចន្ទថា សហរដ្ឋអាមេរិក នឹងជួយធានាសន្តិសុខរបស់អ៊ុយក្រែន នៅក្នុងកិច្ចព្រមព្រៀងណាមួយដើម្បីបញ្ចប់សង្រ្គាមរបស់រុស្ស៊ីនៅទីនោះ ប៉ុន្តែទំហំនៃលទ្ធភាពជំនួយសន្តិសុខបែបនេះនៅមិនច្បាស់ភ្លាមៗនោះទេ។

ទោះបីជាកិច្ចព្រមព្រៀងសន្តិភាពហាក់នៅតែឆ្ងាយបន្ទាប់ពីកិច្ចប្រជុំនៅទីក្រុងវ៉ាស៊ីនតោននេះក៏ដោយ ក៏លោក Zelenskiy បាននិយាយថា កិច្ចប្រជុំកាលពីថ្ងៃចន្ទរបស់លោកជាមួយលោក Trump គឺជាជំនួប "ល្អបំផុត" រហូតមកដល់ពេលនេះ។ លោក Zelenskiy ក៏និយាយផងដែរថា អ៊ុយក្រែនត្រៀមខ្លួនជាស្រេចដើម្បីជួបជាមួយរុស្ស៊ី ទោះក្នុង "ទម្រង់ណាក៏ដោយ" ហើយថា បញ្ហាទឹកដីនឹងត្រូវពិភាក្សាលើកម្រិតទ្វេភាគីជាមួយប្រធានាធិបតីរុស្ស៊ី លោក Vladimir Putin តែប៉ុណ្ណោះ ប៉ុន្តែមិនទាន់មានកាលបរិច្ឆេទសម្រាប់កិច្ចប្រជុំដែលអាចទៅរួចជាមួយទីក្រុងមូស្គូ នៅឡើយទេ៕