ក្រសួងការបរទេសចិន បាននិយាយក្នុងសេចក្ដីថ្លែងការណ៍មួយថា រដ្ឋមន្ត្រីការបរទេសចិន លោក Wang Yi (វ៉ាង យី) បានថ្លែងទៅកាន់សមភាគីឥណ្ឌារបស់លោកកាលពីថ្ងៃចន្ទ (១៨ សីហា) ថា ប្រទេសចិន និងឥណ្ឌា គួរតែបង្កើត "ការយល់ដឹងជាយុទ្ធសាស្រ្តដ៏ត្រឹមត្រូវ" ហើយចាត់ទុកគ្នាជាដៃគូទៅវិញទៅមកយ៉ាងសខាន់ ហើយមិនមែនជាគូប្រជែងនោះឡើយ។

ថ្លែងទៅកាន់ប្រព័ន្ធផ្សព្វផ្សាយនៅក្នុងសន្និសីទសារព័ត៌មានជាប្រចាំនៅទីក្រុងប៉េកាំង អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ប្រទេសចិន កំពុងសម្លឹងមើលការរក្សា "សន្តិភាព និងភាពស្ងប់សុខប្រកបដោយចីរភាពនៅក្នុងតំបន់ព្រំដែន"។

រដ្ឋមន្ត្រីការបរទេសឥណ្ឌា លោក Subrahmanyam Jaishankar ដែលបានបើកកិច្ចពិភាក្សាជាមួយលោក Wang កាលពីថ្ងៃចន្ទដដែលនេះ បានសង្កត់ធ្ងន់ថា អាចមានសន្ទុះវិជ្ជមានក្នុងទំនាក់ទំនងរវាងប្រទេសជិតខាងទាំងពីរនេះ លុះត្រាតែមានសន្តិភាពនៅតាមព្រំដែនរវាងភាគីទាំងពីរ។

លោក Wang កំពុងបំពេញទស្សនកិច្ច ២ថ្ងៃនៅរដ្ឋធានីឥណ្ឌា ជាទីដែលលោកធ្វើកិច្ចចរចាព្រំដែនជុំទី២៤ ជាមួយទីប្រឹក្សាសន្តិសុខជាតិឥណ្ឌា ហើយក៏ជួបជាមួយនាយករដ្ឋមន្ត្រីឥណ្ឌា លោក Narendra Modi ផងដែរ។ ដំណើររបស់លោក Wang កើតឡើងប៉ុន្មានថ្ងៃប៉ុណ្ណោះ មុនពេលលោក Modi ធ្វើដំណើរទៅកាន់ប្រទេសចិន ដែលជាដំណើរទស្សនកិច្ចលើកដំបូងរបស់លោកក្នុងរយៈពេល ៧ឆ្នាំ៕