អាជ្ញាធរសុខាភិបាលហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទ (១៨ សីហា) ថា ចំនួនអ្នកស្លាប់របស់ជនជាតិប៉ាឡេស្ទីននៅដែនដីហ្កាហ្សាស្ទ្រីប បានកើនឡើងដល់ ៦២.០០៤នាក់ និងមនុស្ស ១៥៦.២៣០នាក់ ផ្សេងទៀតបានរងរបួស ចាប់តាំងពីជម្លោះរវាងក្រុមហាម៉ាស និងអ៊ីស្រាអែល បានផ្ទុះឡើងកាលពីថ្ងៃទី៧ ខែតុលា ឆ្នាំ២០២៣ មក។

សេចក្តីថ្លែងការណ៍បន្តថា ក្នុងពេល ២៤ម៉ោងកន្លងទៅនោះ ការវាយប្រហាររបស់អ៊ីស្រាអែល បានសម្លាប់ជនជាតិប៉ាឡេស្ទីនយ៉ាងតិច ៦០នាក់ និងជាង ៣៤០នាក់ ផ្សេងទៀតរងរបួស។ ក្នុងចំណោមអ្នកស្លាប់ទាំង ៦០នាក់នោះ មានមនុស្ស ២៧នាក់ស្លាប់ និង ២៨១នាក់រងរបួស នៅពេលកំពុងរង់ចាំទទួលជំនួយមនុស្សធម៌។

សេចក្តីថ្លែងការណ៍និយាយថា ចាប់តាំងពីមូលនិធិមនុស្សធម៌ហ្កាហ្សា (GHF) ដែលគាំទ្រដោយសហរដ្ឋអាមេរិក និងអ៊ីស្រាអែល បានចាប់ផ្តើមចែកចាយជំនួយនៅក្នុងតំបន់ហ្កាហ្សា កាលពីថ្ងៃទី២៧ ខែឧសភាមក មានអ្នកស្វែងរកជំនួយសរុបចំនួន ១.៩៦៥នាក់ត្រូវបានសម្លាប់ និងជាង ១៤.៧០០នាក់ ផ្សេងទៀតបានរងរបួស។

ប្រជាជនប៉ាឡេស្ទីន បានអំពាវនាវឱ្យមានការតវ៉ានៅទីក្រុងហ្កាហ្សា ជាទីដែលអ៊ីស្រាអែលមានផែនការចូលកាន់កាប់ ដោយទាមទារឱ្យបញ្ចប់សង្គ្រាមជិត ២ឆ្នាំដ៏បង្ហូរឈាម ដែលបានបង្កឱ្យមានវិបត្តិមនុស្សធម៌យ៉ាងធ្ងន់ធ្ងរនេះ។ ពួកគេប្រជាជនប៉ាឡេស្ទីនក៏ទាមទារឱ្យក្រុមហាម៉ាស បង្កើនកិច្ចប្រឹងប្រែងចរចា ដើម្បីបញ្ចៀសការវាយលុកដោយអ៊ីស្រាអែល។ មន្ត្រីជាន់ខ្ពស់ក្រុមហាម៉ាស បានបញ្ជាក់ថា ក្រុមនេះបានយល់ព្រមលើសំណើបទឈប់បាញ់ថ្មីជាមួយអ៊ីស្រាអែលហើយ៕