ក្រុមប្រឹក្សាទំនាក់ទំនងឧស្សាហកម្មរបស់ប្រទេសកាណាដា (CIRB) បាននិយាយថា កូដកម្មកំពុងបន្តរបស់ក្រុមហ៊ុនអាកាសចរណ៍ Air Canada ដែលក្នុងនោះសមាជិកយានិកចំនួន១០.០០០នាក់បានដើរចេញពីការងាររបស់ខ្លួនគឺខុសច្បាប់ បន្ទាប់ពីអ្នកធ្វើកូដកម្មមិនអើពើនឹងទៅនឹងបទបញ្ជាឱ្យវិលត្រឡប់ទៅធ្វើការវិញ។

ក្រុមប្រឹក្សានិយតកម្ម បានធ្វើការអំពាវនាវកាលពីថ្ងៃចន្ទ បន្ទាប់ពីខ្លួនបានប្រកាសកាលពីពេលមុនថា បុគ្គលិកត្រូវត្រឡប់ទៅធ្វើការវិញនៅត្រឹមម៉ោង២រសៀល ម៉ោងក្នុងតំបន់កាលពីថ្ងៃអាទិត្យ។

សមាជិកយានិកសម្រាប់ក្រុមហ៊ុនអាកាសចរណ៍ដែលមានមូលដ្ឋាននៅទីក្រុងម៉ុងត្រេអាល់ បានជំរុញឱ្យមានដំណោះស្រាយដែលបានចរចាគ្នា។ បុគ្គលិកបាននិយាយថាការដំឡើងប្រាក់ឈ្នួលដែលបានស្នើឡើងគឺមិនគ្រប់គ្រាន់ដើម្បីទប់ទល់អតិផរណានិងឲ្យត្រូវគ្នាទៅនឹងប្រាក់ឈ្នួលអប្បបរមារបស់សហព័ន្ធឡើយ។

អ្នកបម្រើការលើយន្តហោះក៏កំពុងអំពាវនាវឱ្យផ្តល់ប្រាក់ឈ្នួលសម្រាប់ការងារដែលបានអនុវត្តនៅពេលយន្តហោះចត ដូចជាជួយអ្នកដំណើរឡើងលើយន្តហោះជាដើម។ បច្ចុប្បន្ននេះ ពួកគេត្រូវបានផ្តល់ប្រាក់ឈ្នួលតែនៅពេលដែលយន្តហោះកំពុងហោះហើរតែប៉ុណ្ណោះ ដែលជំរុញឱ្យមានការគាំទ្រពីប្រជាជនកាណាដានៅលើបណ្តាញផ្សព្វផ្សាយសង្គម។

មេដឹកនាំនៃសហជីពដែលធ្វើកូដកម្មប្រឆាំងក្រុមហ៊ុនអាកាសចរណ៍ Air Canada បាននិយាយកាលពីថ្ងៃចន្ទថា លោកសុខចិត្តប្រឈមការជាប់ពន្ធនាគារជាជាងអនុញ្ញាតឱ្យបុគ្គលិកយានិកត្រូវបានបង្ខំឱ្យត្រឡប់ទៅធ្វើការវិញ។