របាយការណ៍នានាដែលថាក្រុមហាម៉ាស បានយល់ព្រមលើសំណើបទឈប់បាញ់ថ្មី និងការដោះដូរចំណាប់ថ្នូរនៅតំបន់ហ្កាហ្សាស្រ្ទីប កាលពីថ្ងៃចន្ទ (១៨ សីហា) បានទាក់ទាញប្រតិកម្មយ៉ាងឆាប់រហ័សនៅអ៊ីស្រាអែល ដោយក្រុមអ្នកគាំទ្របានជំរុញឱ្យសម្រេចកិច្ចព្រមព្រៀងឆាប់រហ័ស ប៉ុន្តែអ្នកជំទាស់ - រួមទាំងសមាជិកក្រុមចម្រុះសំខាន់ៗ - បានព្រមានលោកនាយករដ្ឋមន្ត្រីអ៊ីស្រាអែល Benjamin Netanyahu ប្រឆាំងនឹងការធ្វើដូច្នេះ។

ក្រុមហាម៉ាស បានប្រាប់អ្នកសម្រុះសម្រួលថា ខ្លួនទទួលយកសំណើចុងក្រោយបំផុត ដែលប្រភពនិយាយថា ពាក់ព័ន្ធនឹងការផ្អាកប្រយុទ្ធ ៦០ថ្ងៃ និងការដោះលែងចំណាប់ថ្នូរនៅរស់ចំនួន ១០នាក់ ខណៈក្រុមអ្នកសម្រុះសម្រួលប្រឹងប្រែងសម្រេចកិច្ចព្រមព្រៀងមួយឱ្យបានឆាប់ មុនពេលអ៊ីស្រាអែល បើកយុទ្ធនាការដែលខ្លួនគ្រោងទុកនៃការចូលកាន់កាប់ទីក្រុងហ្កាហ្សា។

រដ្ឋមន្ត្រីសន្តិសុខជាតិស្តាំនិយមជ្រុល លោក Itamar Ben Gvir បាននិយាយក្នុងសេចក្តីថ្លែងការណ៍មួយ ដែលផ្ញើទៅកាន់លោក Netanyahu ថា "អ្នកពុំមានអំណាចសម្រេចកិច្ចព្រមព្រៀងមួយផ្នែកបែបនេះបានទេ"។ រដ្ឋមន្ត្រីក្រសួងហិរញ្ញវត្ថុ លោក Bezalel Smotrich ក៏បានជំទាស់នឹងកិច្ចព្រមព្រៀងបែបនេះ ដោយអះអាងថា ក្រុមហាម៉ាស បានបន្ធូរការទាមទាររបស់ខ្លួនព្រោះតែបារម្ភថា ការវាយលុករបស់អ៊ីស្រាអែលដែលគ្រោងទុកនៅទីក្រុងហ្កាហ្សា អាចនឹងបំផ្លាញក្រុមនេះតែប៉ុណ្ណោះ។

ផ្ទុយពីការប្រឆាំងយ៉ាងម៉ឺងម៉ាត់នេះ វេទិកាចំណាប់ថ្នូរ និងគ្រួសារអ្នកបាត់ខ្លួន បាននិយាយក្នុងការឆ្លើយតបទៅនឹងរបាយការណ៍កិច្ចព្រមព្រៀងនេះថា៖ អ្នកគ្រប់គ្នាទាមទារឱ្យលោក Netanyahu ធ្វើការចរចាបន្តបន្ទាប់ជាបន្ទាន់សម្រាប់ការដោះលែងចំណាប់ថ្នូរ និងអ្នកជាប់ឃុំទាំងអស់ចេញពីតំបន់ហ្កាហ្សាឱ្យបានឆាប់បំផុត៕