សារព័ត៌មាន Financial Times (FT) បានរាយការណ៍កាលពីថ្ងៃចន្ទ (១៨ សីហា) ដោយសម្អាងដល់ឯកសារដែលខ្លួនមើលឃើញថា អ៊ុយក្រែន នឹងសន្យាទិញសព្វាវុធរបស់សហរដ្ឋអាមេរិក មានតម្លៃ ១០០ពាន់លានដុល្លារ ដែលផ្តល់ហិរញ្ញប្បទានដោយសម្ព័ន្ធមិត្តអឺរ៉ុប ជាផ្នែកនៃកិច្ចព្រមព្រៀងមួយដើម្បីទទួលបានការធានាពីទីក្រុងវ៉ាស៊ីនតោន សម្រាប់សន្តិសុខរបស់អ៊ុយក្រែន បន្ទាប់ពីមានដំណោះស្រាយសន្តិភាពណាមួយជាមួយរុស្ស៊ី។

សារព័ត៌មាននេះបានបន្ថែមថា នៅក្រោមសំណើនេះ អ៊ុយក្រែន និងអាមេរិក ក៏នឹងឈានដល់កិច្ចព្រមព្រៀងតម្លៃ ៥០ពាន់លានដុល្លារ ដើម្បីផលិតយានដ្រូនជាមួយក្រុមហ៊ុននានារបស់អ៊ុយក្រែនផងដែរ។

ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅថ្ងៃអង្គារ (១៩ សីហា) នេះបន្ទាប់ពីកិច្ចប្រជុំជាមួយលោកប្រធានាធិបតីអាមេរិក Donald Trump និងមេដឹកនាំអឺរ៉ុបថា ការធានាសន្តិសុខសម្រាប់ទីក្រុងគីវ ទំនងជានឹងត្រូវបានសម្រេចក្នុងរយៈពេល ១០ថ្ងៃដ៏ឆាប់ខាងមុខនេះ។

ចំណែកលោក Trump វិញក៏បានប្រាប់លោក Zelenskiy កាលពីថ្ងៃចន្ទថា សហរដ្ឋអាមេរិក នឹងជួយធានាសន្តិសុខរបស់អ៊ុយក្រែន នៅក្នុងកិច្ចព្រមព្រៀងណាមួយដើម្បីបញ្ចប់សង្រ្គាមរបស់រុស្ស៊ីនៅទីនោះ ប៉ុន្តែទំហំនៃលទ្ធភាពជំនួយសន្តិសុខបែបនេះនៅមិនច្បាស់ភ្លាមៗនៅឡើយទេ៕