យោងតាមសេចក្តីរាយការណ៍បានឱ្យដឹងថា ប្រធានាធិបតីរុស្ស៊ី លោក Vladimir Putin បានប្រាប់សមភាគីអាមេរិក លោក Donald Trump ថា ការទាមទារមួយរបស់លោកដើម្បីសន្តិភាពនៅអ៊ុយក្រែន គឺជាការគ្រប់គ្រងទាំងស្រុងលើតំបន់ Donbas ដែលបង្កើតឡើងដោយតំបន់ពីរគឺ Donetsk និង Luhansk។ យ៉ាងណាមិញ ស្ថាប័នសង្រ្គាមដ៏ធំមួយអះអាងថា គោលដៅបែបនេះអាចធ្វើទៅបាន លុះត្រាតែអ៊ុយក្រែន ដកកម្លាំងចេញពីតំបន់ Donetsk ជាមុនសិន។

លោក Putin បានព្យាយាមកាន់កាប់តំបន់ Donbas អស់ពេល ១១ឆ្នាំមកហើយ ចាប់តាំងពីប្រតិបត្តិការយោធាលើកដំបូងរបស់រុស្ស៊ី លើអ៊ុយក្រែន ទាក់ទងនឹងឧបទ្វីបគ្រីម៉េ ប៉ុន្តែសូម្បីតែបន្ទាប់ពីកិច្ចប្រឹងប្រែងយ៉ាងក៏ដោយ ក៏ទីក្រុងមូស្គូ នៅតែបរាជ័យក្នុងការកាន់កាប់ Donbas ទាំងមូលបាន ដោយសារកងកម្លាំងអ៊ុយក្រែននៅតែមានវត្តមានក្នុងទឹកដី Donetsk ហើយសង្ឃឹមថានឹងអាចធ្វើបែបនេះ ជាមួយនឹងការទាមទារអតិបរមាក្រោមការសម្របសម្រួលសន្តិភាពរបស់លោក Trump។

វិទ្យាស្ថានសម្រាប់ការសិក្សាសង្គ្រាម ISW ដែលមានមូលដ្ឋាននៅសហរដ្ឋអាមេរិក បានប៉ាន់ប្រមាណថា រុស្ស៊ី នឹងមិនអាចដណ្តើមយកទឹកដីដែលនៅសេសសល់នៃតំបន់ Donetsk ទាំងមូលយ៉ាងឆាប់រហ័សតាមរយៈកម្លាំងបានទេ ខណៈកងកម្លាំងរុស្ស៊ី បានបរាជ័យអស់ជាងមួយទសវត្សរ៍មកហើយ។

បន្ទាប់ពីការវិភាគលើល្បឿនវាយរុលរបស់រុស្ស៊ីក្នុងតំបន់នេះ ISW និយាយថា៖ «រុស្ស៊ីអាចដណ្តើមយកតំបន់ Donetsk ទាំងមូលបានយ៉ាងឆាប់រហ័ស ប្រសិនបើអ៊ុយក្រែន យល់ព្រមតាមការទាមទាររបស់លោក Putin ហើយដកកម្លាំងចេញពីតំបន់នោះ»។ ស្ថាប័ន ISW នេះបន្ថែមថា ការអះអាងរបស់លោក Putin ដែលថា កម្លាំងរុស្ស៊ីនឹងដណ្តើមយកតំបន់ Donetsk ទាំងអស់បានដោយជៀសមិនរួច ប្រសិនបើសង្រ្គាមនៅតែបន្តទៅមុខនោះ ហាក់ដូចជាមិនមែនជាការពិតឡើយ៕