ដោយខ្លាចការវាយលុកលើដីរបស់អ៊ីស្រាអែលដែលជិតកើតឡើង ប្រជាជនប៉ាឡេស្ទីនរាប់ពាន់នាក់ បានចាកចេញពីផ្ទះសម្បែង នៅតំបន់ភាគខាងកើតនៃទីក្រុងហ្កាហ្សា ដែលឥឡូវនេះរងការវាយប្រហារឥតឈប់ឈររបស់អ៊ីស្រាអែល សម្រាប់ចំណុចជាច្រើននៅភាគខាងលិច និងភាគខាងត្បូងនៃទឹកដី ដែលត្រូវបានបំផ្លិចបំផ្លាញស្ទើរតែទាំងស្រុងនេះ។

ផែនការរបស់អ៊ីស្រាអែលក្នុងការដណ្តើមគ្រប់គ្រងទីក្រុងហ្កាហ្សា បានធ្វើឲ្យមានការព្រួយបារម្ភ នៅក្រៅប្រទេស និងនៅក្នុងប្រទេស ជាទីដែលប្រជាជនអ៊ីស្រាអែលរាប់ម៉ឺននាក់ បានធ្វើការតវ៉ាដ៏ធំបំផុតមួយចំនួនដែលត្រូវបានគេឃើញ ចាប់តាំងពីសង្រ្គាម បានចាប់ផ្តើម ដោយជំរុញឲ្យកិច្ចព្រមព្រៀងបញ្ចប់ការប្រយុទ្ធគ្នា និងដោះលែងចំណាប់ថ្នូរដែលនៅសេសសល់ ៥០នាក់ ដែលត្រូវបានឃុំខ្លួនដោយក្រុមសកម្មប្រយុទ្ធប៉ាឡេស្ទីន នៅក្នុងតំបន់ហ្កាហ្សា។

ការវាយលុកដែលបានគ្រោងទុក បានជំរុញឲ្យអ្នកសម្របសម្រួលបទឈប់បាញ់របស់អេហ្ស៊ីប និងកាតា បង្កើនកិច្ចខិតខំប្រឹងប្រែង នៅក្នុងអ្វីដែលប្រភពដែលបានដឹងអំពីការពិភាក្សា ជាមួយក្រុមសកម្មប្រយុទ្ធហាម៉ាស នៅទីក្រុងគែរ បាននិយាយថា អាចជា «កិច្ចប្រឹងប្រែងចុងក្រោយ»។

នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ ( Benjamin Netanyahu) បានពណ៌នាទីក្រុងហ្កាហ្សា ជាបន្ទាយនៅក្នុងទីក្រុងដ៏ធំចុងក្រោយរបស់ក្រុមហាម៉ាស។ ប៉ុន្តែ ដោយសារអ៊ីស្រាអែលកាន់កាប់ ៧៥ភាគរយនៃតំបន់ហ្កាហ្សារួចហើយ យោធាបានព្រមានថា ការពង្រីកការវាយលុក អាចបង្កគ្រោះថ្នាក់ដល់ចំណាប់ខ្មាំង ដែលនៅមានជីវិត និងទាក់ទាញកងទ័ពចូលទៅក្នុងសង្រ្គាមទ័ពព្រៃ ដែលអូសបន្លាយបេលយូរ និងបណ្តាលឲ្យមនុស្សស្លាប់យ៉ាងច្រើន។