យោធាអ៊ីរ៉ាក់បាននិយាយថា ការដកកងកម្លាំងចម្រុះអន្តរជាតិដឹកនាំដោយសហរដ្ឋអាមេរិក ចេញពីប្រទេសអ៊ីរ៉ាក់ គឺជា«សមិទ្ធិផលមួយក្នុងចំណោមសមិទ្ធផលផ្សេងៗទៀតរបស់រដ្ឋាភិបាល»។

លោក Sabah al-Numan អ្នកនាំពាក្យរបស់អគ្គមេបញ្ជាការនៃកងកម្លាំងអ៊ីរ៉ាក់ បានប្រាប់ទីភ្នាក់ងារសារព័ត៌មានផ្លូវការរបស់អ៊ីរ៉ាក់ (INA) ថា៖«ការដកកងកម្លាំងចម្រុះអន្តរជាតិចេញពីប្រទេសអ៊ីរ៉ាក់ គឺជាសមិទ្ធិផលមួយក្នុងចំណោមសមិទ្ធផលនានារបស់រដ្ឋាភិបាល និងជាការបង្ហាញពីសមត្ថភាពរបស់អ៊ីរ៉ាក់ ក្នុងការប្រយុទ្ធប្រឆាំងអំពើភេរវកម្ម និងរក្សាសន្តិសុខ និងស្ថិរភាព ដោយមិនត្រូវការជំនួយពីអ្នកដទៃទៀតទេ»។

ការអត្ថាធិប្បាយរបស់លោក Al-Numan បានកើតឡើង នៅពេលដែលរបាយការណ៍ប្រព័ន្ធផ្សព្វផ្សាយបង្ហាញថា កងកម្លាំងសហរដ្ឋអាមេរិក បានចាប់ផ្តើមដកកងទ័ពរបស់ពួកគេមួយចំនួនចេញពីមូលដ្ឋានទ័ពអាកាស Ayn al-Asad ក្នុងខេត្ត Anbar ភាគខាងលិចនៃប្រទេសអ៊ីរ៉ាក់។

កាលពីថ្ងៃអាទិត្យ លោក Hussein Allawi ទីប្រឹក្សាសន្តិសុខរបស់នាយករដ្ឋមន្ត្រីអ៊ីរ៉ាក់ Mohammed Shia al-Sudani បានប្រាប់សារព័ត៌មាន INA ថា បេសកកម្មរបស់ក្រុមចម្រុះអន្តរជាតិដឹកនាំដោយសហរដ្ឋអាមេរិក នៅទីក្រុងបាកដាដ និងនៅឯមូលដ្ឋាន Ayn al-Asad នឹងបញ្ចប់ នៅក្នុងខែកញ្ញា។

សហរដ្ឋអាមេរិក មានទាហានប្រមាណ២.៥០០នាក់ នៅក្នុងប្រទេសអ៊ីរ៉ាក់ ជាផ្នែកនៃក្រុមចម្រុះដែលបានបង្កើត ក្នុងឆ្នាំ ២០១៤ ដើម្បីប្រយុទ្ធប្រឆាំងនឹងក្រុមរដ្ឋឥស្លាម (IS) ខណៈដែលក្រុមនេះ បានវាយលុកពេញប្រទេស។