ទូរទស្សន៍Al Jazeera បានរាយការណ៍ ដោយដកស្រង់ទិន្នន័យពីក្រសួងសុខាភិបាលហ្កាហ្សាថា មន្ទីរពេទ្យភាគច្រើននៅតំបន់ហ្កាហ្សាស្ទ្រីប លែងដំណើរការទៀតហើយ ខណៈដែលបុគ្គលិកពេទ្យជាង ១.៥០០ នាក់ ត្រូវបានសម្លាប់នៅក្នុងប្រតិបត្តិការយោធា នៅក្នុងដែនដីននេះ ចាប់តាំងពីខែតុលា ឆ្នាំ ២០២៣។  

យោងតាមក្រសួង មានតែមន្ទីរពេទ្យចំនួន ១៥ ប៉ុណ្ណោះក្នុងចំណោមមន្ទីរពេទ្យប្រហែល ៤០ នៅតំបន់ហ្កា ហ្សា នៅតែដំណើរការ។ បុគ្គលិកពេទ្យច្រើនដល់ទៅ ១.៥៩០នាក់ ក្នុងវេជ្ជបណ្ឌិតយ៉ាងហោចណាស់ ២០០ នាក់ ត្រូវបានសម្លាប់ ដែលធ្វើឲ្យចុះខ្សោយសមត្ថភាពរបស់វិស័យសុខាភិបាល ក្នុងការផ្តល់ការថែទាំចាំបាច់ ដល់ប្រជាជននៅតំបន់ហ្កាហ្សា។

ក្រសួងសុខាភិបាល បានបន្ថែមថា ស្ទើរតែជីវិតរបស់កុមារ ៣០០.000នាក់ នៅតំបន់ហ្កាហ្សា កំពុងស្ថិតក្នុងគ្រោះថ្នាក់ ដោយសារតែភាពអត់ឃ្លាន និងកង្វះអាហារូបត្ថម្ភ ខណៈដែលមនុស្សពេញវ័យ កំពុងទទួលរងពីភាពស្លេកស្លាំងខ្សោយកម្លាំង ដែលធ្វើឲ្យពិបាកក្នុងការស្វែងរកអ្នកបរិច្ចាគឈាមសម្រាប់អ្នករងរបួស។

ភាពតានតឹង បានកើនឡើងម្តងទៀត នៅមជ្ឈិមបូព៌ា នៅថ្ងៃទី ០៧ ខែតុលា ឆ្នាំ ២០២៣ នៅពេលដែលក្រុមសកម្មប្រយុទ្ធមកពីចលនាសកម្មប្រយុទ្ធប៉ាឡេស្ទីនហាម៉ាស ដែលមានមូលដ្ឋាននៅតំបន់ហ្សាស្ទ្រីប បានបើកការវាយប្រហារដ៏គួរឲ្យភ្ញាក់ផ្អើលមួយលើអ៊ីស្រាអែល ដោយបានសម្លាប់អ្នករស់នៅតាមព្រំដែន និងចាប់ចំណាប់ថ្នូរជាច្រើននាក់។ ជាការឆ្លើយតប អ៊ីស្រាអែល បានផ្តួចផ្តើមប្រតិបត្តិការយោធា នៅក្នុងទឹកដីប៉ាឡេស្ទីន ដើម្បីរុះរើរចនាសម្ព័ន្ធយោធា និងនយោបាយរបស់ក្រុមហាម៉ាស និងដោះលែងចំណាប់ខ្មាំង។