តុងហ្គា៖ ក្រុមការងារកំពុងធ្វើការទាំងអស់សង្ឃឹមដើម្បីសម្អាតម្ទេចផេះ ពីផ្លូវរថយន្តហោះរបស់អាកាសយានដ្ឋានដ៏សំខាន់របស់ប្រទេសកោះតុងហ្គា ក្នុងកិច្ចខិតខំប្រឹងប្រែងដើម្បីដឹកជញ្ជូនជំនួយផ្គត់ផ្គង់សំខាន់ៗ ទៅដល់តំបន់នេះក្រោយការផ្ទុះភ្នំភ្លើង។ មនុស្សប្រមាណ ២០០នាក់ប្រដាប់ដោយរទេះរុញ និងប៉ែលកំពុងសម្អាតដើម្បីឲ្យជើងហោះហើរនានាអាចដឹកជញ្ជូនចំនីអាហារ និងទឹកស្អាតសម្រាប់ទទួលទានចូលមកកាន់តំបន់កោះនៅមហាសមុទ្រប៉ាស៊ីហ្វិកមួយនេះ។
ប្រទេសណូវ៉ែលហ្សេឡង់ និងអូស្ត្រាលីក៏បានបញ្ជូនជំនួយតាមនាវាផងដែរ ឆ្លើយតបទៅនឹងការផ្ទុះកាលពីថ្ងៃសៅរ៍ដែលបង្កឲ្យមានជារលកយក្សស៊ូណាមិ។ រហូតមកដល់ពេលនេះមានមនុស្ស ៤នាក់ហើយដែលត្រូវបានគេរាយការណ៍ថាបានបាត់បង់ជីវិត ក្នុងនោះមាន ៣នាក់មកពីប្រទេសផ្សេង និងម្នាក់ទៀតជាស្ត្រីជនជាតិអង់គ្លេស។ រដ្ឋាភិបាលតុងហ្គាបានហៅការផ្ទុះដែលបានព្រួសផេះឧស្ម័ន ផ្សែង និងកម្ទេចកម្ទីផ្សេងៗពីភ្នំភ្លើងកម្ពស់ ២០គីឡូម៉ែត្រឡើងលើអាកាសថា ជាគ្រោះមហន្តរាយមិនធ្លាប់មាន។
នៅថ្ងៃពុធនៅក្នុងប្រទេសតុងហ្គា តំណាងអង្គការសហប្រជាជាតិប្រចាំតំបន់នេះបាននិយាយថា ខណៈដែលកំពុងសម្អាតកម្ទេចផេះនៅលើកោះដ៏សំខាន់ Tongatapu បានបង្ហាញពីការលំបាកខ្លាំងជាងការរំពឹងទុក ក៏មានការរីកចម្រើនកើតឡើង ហើយគេរំពឹងថាជើងហោះហើរនានានឹងអាចដំណើរការឡើងវិញក្នុងពេលឆាប់ៗនេះ។ អង្គការសហប្រជាជាតិបានរាយការណ៍ពីការខូចខាតទ្រព្យសម្បត្តិ ធ្ងន់ធ្ងរនៅភាគខាងលិចកោះ Tongatapu៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
