ក្រុមហ៊ុននាំចេញ និងអាជីវកម្មតាមបណ្តោយព្រំដែនថៃ-មីយ៉ាន់ម៉ា កំពុងប្រឈមនឹងវិបត្តិធ្ងន់ធ្ងរ បន្ទាប់ពីអាជ្ញាធររបស់សហភាពមីយ៉ាន់ម៉ា បានបិទស្ពានមិត្តភាពថៃ-មីយ៉ាន់ម៉ាទី២ ភ្លាមៗ។

ការបិទដែលត្រូវបានរាយការណ៍ថា បានបញ្ជាឲ្យមានការគ្រប់គ្រងលើប្រាក់ចំណូលពាណិជ្ជកម្មនោះ បាននាំឲ្យលំហូរនៃទំនិញដ៏ច្រើនសន្ធឹកសន្ធាប់ត្រូវបញ្ឈប់ និងកំពុងគំរាមកំហែងដល់ពាណិជ្ជកម្មដែលមានតម្លៃប្រមាណ ១៣០ពាន់លានបាត (៤ពាន់លានដុល្លារ)។

កាលពីថ្ងៃចន្ទ ទី១៨ ខែសីហា ឆ្នាំ២០២៥ មន្ត្រីនៅទីក្រុង Myawaddy រដ្ឋ Kayin ទល់មុខតំបន់ Mae Sot របស់ថៃ បានបិទច្រកព្រំដែនភ្លាមៗមិនឲ្យរថយន្តធំៗ និងទំនិញពាណិជ្ជកម្មទាំងអស់ចេញចូល។ វិធានការនេះបានធ្វើឡើងដោយគ្មានការព្រមានជាមុនដល់អាជ្ញាធរថៃ ក្នុងនោះរួមទាំងមន្ត្រីគយក្នុងតំបន់ Mae Sot ផងដែរ។

យោងតាមសេចក្ដីរាយការណ៍ បានឲ្យដឹងថា បទបញ្ជានេះបានផ្ដើមចេញពីរដ្ឋធានី Naypyidaw ជាផ្នែកនៃការបង្រ្កាប ដែលត្រូវបានធ្វើឡើងក្នុងគោលបំណងបង្វែរប្រាក់ចំណូលបានពីពាណិជ្ជកម្មតាមព្រំដែនទៅកាន់រដ្ឋាភិបាលកណ្តាល។ 

អស់ជាច្រើនឆ្នាំមកនេះ ផ្នែកដ៏សំខាន់នៃប្រាក់ចំណូលនេះបានផ្ដល់ផលប្រយោជន៍ដល់ក្រុមប្រដាប់អាវុធជនជាតិភាគតិចជាច្រើន ក្នុងនោះរួមទាំងកងកម្លាំងការពារព្រំដែន (BGF) ដែលជាកម្លាំងយោធាដ៏លេចធ្លោនៅក្នុងតំបន់។ ឥឡូវនេះ រដ្ឋាភិបាលរបស់សហភាពមីយ៉ាន់ម៉ាកំពុងស្វែងរកការបង្កើតការគ្រប់គ្រងឡើងវិញ និងបង្កើនប្រាក់ចំណូលរបស់ខ្លួន។

បើទោះបីជាស្ពានពាណិជ្ជកម្មដ៏សំខាន់នេះនៅតែបិទក៏ដោយ ក៏ស្ពានមិត្តភាពថៃ-មីយ៉ាន់ម៉ាទី១ នៅតែបើកដំណើរការ សម្រាប់អ្នកថ្មើរជើង និងពាណិជ្ជកម្មក្នុងស្រុកខ្នាតតូច។ តែយ៉ាងណាក្ដី ស្ពានទី២ គឺជាផ្លូវចម្បង សម្រាប់ការនាំចូល និងនាំចេញទ្រង់ទ្រាយធំ ហើយការបិទស្ពាននេះ បានបង្កឲ្យមានការរំខានយ៉ាងខ្លាំងដល់ក្រុមហ៊ុនដឹកជញ្ជូន អ្នកដឹកជញ្ជូន និងអាជីវករ៕