ប្រធានាធិបតីបារាំង លោក Emmanuel Macron កាលពីថ្ងៃចន្ទ (ទី១៨ ខែសីហា) បានអំពាវនាវឲ្យបង្កើនការដាក់ទណ្ឌកម្មលើរុស្ស៊ី ប្រសិនបើមេដឹកនាំរបស់ប្រទេសនេះ គឺលោក Vladimir Putin មិនធ្វើការឆ្ពោះទៅកាន់ការមានសន្តិភាពជាមួយអ៊ុយក្រែនទេនោះ។

បន្ទាប់ពីមានកិច្ចពិភាក្សានៅឯសេតវិមាន លោក Macron បានប្រាប់អ្នកសារព័ត៌មានថា៖ «លោកប្រធានាធិបតី (Donald) Trump ជឿជាក់ថា យើងអាចទទួលបានកិច្ចព្រមព្រៀងមួយ ហើយជឿជាក់ថា លោកប្រធានាធិបតី Putin ក៏ចង់បានកិច្ចព្រមព្រៀងសន្តិភាពផងដែរ។ ប៉ុន្តែប្រសិនបើនៅទីបញ្ចប់ដំណើរការនេះត្រូវបានតបដោយការបដិសេធនោះ យើងក៏ត្រៀមខ្លួនឲ្យរួចជាស្រេច ក្នុងការនិយាយថា យើងត្រូវបង្កើនការដាក់ទណ្ឌកម្ម»។

មេដឹកនាំបារាំងបានចង្អុលទៅទណ្ឌកម្មបន្ថែមថ្មីៗនេះដែលដាក់ដោយរដ្ឋបាលរបស់លោក Trump លើប្រទេសឥណ្ឌា ដែលបានលេចឡើងក្នុងនាមជាអ្នកទិញថាមពលរុស្ស៊ីដ៏ធំ ខណៈដែលបណ្តាប្រទេសលោកខាងលិច បានកាត់បន្ថយដោយសារតែមានការដាក់ទណ្ឌកម្ម បន្ទាប់ពីលោក Putin បានបញ្ជាឲ្យលុកលយអ៊ុយក្រែន។ លោក Macron បានបញ្ជាក់ថា ទណ្ឌកម្មបន្ថែមលើប្រទេសឥណ្ឌា «ផ្ដល់ផលប៉ះពាល់ច្រើនណាស់»។

ក្នុងកិច្ចប្រឹងប្រែង ដើម្បីបញ្ចប់សង្គ្រាម លោក Trump បានអញ្ជើញប្រធានាធិបតីអ៊ុយក្រែន លោក Volodymyr Zelenskyy ទៅកាន់សេតវិមាន ពោលគឺ ៣ថ្ងៃបន្ទាប់ពីប្រធានាធិបតីអាមេរិក បានស្វាគមន៍លោក Putin សម្រាប់កិច្ចពិភាក្សា នៅរដ្ឋ Alaska៕