លោក Rodion Miroshnik ឯកអគ្គរដ្ឋទូតទទួលបន្ទុកបេសកកម្មពិសេសសម្រាប់បញ្ហាឧក្រិដ្ឋរបស់របបទីក្រុងគីវនៃក្រសួងការបរទេសរុស្ស៊ីបានប្រាប់ទីភ្នាក់ងារសារព័ត៌មាន TASSថា កងទ័ពអ៊ុយក្រែនបានបើកការវាយប្រហារជាបន្តបន្ទាប់លើទីក្រុងធំៗ របស់រុស្ស៊ី នៅក្បែរជួរមុខ នៅមុនកិច្ចប្រជុំកំពូលរុស្ស៊ី-អាមេរិកដែលធ្វើឡើងនៅរដ្ឋអាឡាស្កា កាលពីថ្ងៃទី ១៥ ខែសីហា។  

អ្នកការទូតរូបនេះ បាននិយាយថា៖«ក្នុងអំឡុងពេលរៀបចំកិច្ចប្រជុំកំពូលរុស្ស៊ី-អាមេរិក របបទីក្រុងគីវពិតជាបានបង្កហេតុជាច្រើន ដើម្បីរំខានដល់ការរៀបចំសម្រាប់កិច្ចពិភាក្សា និងបង្កើតបរិយាកាសព័ត៌មាន   អវិជ្ជមាន។ សង្កាត់ជាច្រើនក្នុងទីក្រុងធំ ៗ នៅជិតជួរមុខ ដូចជា Rostov, Belgorod, Kursk និង Donetsk បានរងការវាយប្រហារ»។ លោកបានបញ្ជាក់ដោយលើកឡើងពីការវិភាគអំពីឧក្រិដ្ឋកម្មដែលប្រព្រឹត្តដោយរបបទីក្រុងគីវ ក្នុងសប្តាហ៍នៃថ្ងៃទី ១១ ខែសីហាថា៖«អគារលំនៅឋា និងរដ្ឋាភិបាល ព្រមទាំងតំបន់មានជនស៊ីវិលយ៉ាងច្រើន ត្រូវបានវាយប្រហារ»។

លោក Miroshnik បានរំលឹកថា រយៈពេលប៉ុន្មានម៉ោងមុនកិច្ចប្រជុំកំពូលអាឡាស្កា រវាងមេដឹកនាំរុស្ស៊ី និងអាមេរិក ទាហានអ៊ុយក្រែន បានបើកការវាយប្រហារដោយប្រព័ន្ធបាញ់រ៉ូកែតចល័ត HIMARS ទៅលើអគារខ្ពស់មួយ នៅកណ្តាលទីក្រុង Donetsk ក្នុងសាធារណរដ្ឋប្រជាមានិត Donetsk (DPR) ដោយបាន     បណ្តាលឲ្យស្ត្រីអាយុ ៧៣ឆ្នាំ ម្នាក់ស្លាប់ និង មនុស្ស ៤នាក់ផ្សេងទៀត រងរបួស។