ប្រធានាធិបតីសហរដ្ឋអាមេរិក Donald Trump និងប្រធានគណៈកម្មការអឺរ៉ុប លោកស្រី Ursula von der Leyen កាលពីថ្ងៃចន្ទ (ទី១៨ ខែសីហា) បាននិយាយថា ថ្នាក់ដឹកនាំទាំង២ បាននិយាយអំពីកុមារបាត់ខ្លួនដោយសារតែជម្លោះ នៅពេលដែល Trump ធ្វើជាម្ចាស់ផ្ទះស្វាគមន៍មេដឹកនាំអឺរ៉ុប និងអង្គការណាតូ នៅទីក្រុងវ៉ាស៊ីនតោន ដើម្បីពិភាក្សាអំពីសង្គ្រាមរបស់រុស្ស៊ី នៅប្រទេសអ៊ុយក្រែន។

កាលពីថ្ងៃសុក្រចុងសប្ដាហ៍កន្លងមក នៅពេលដែលលោក Trump បានជួបជាមួយលោក Vladimir Putin ក្នុងជំនួបកំពូល នៅរដ្ឋ Alaska មន្ត្រីសេតវិមាន ២រូប បាននិយាយថា ភរិយារបស់លោក Trump គឺលោកស្រី Melania Trump បានលើកឡើងពីស្ថានភាពរបស់កុមារ នៅក្នុងប្រទេសអ៊ុយក្រែន និងរុស្ស៊ី តាមរយៈសំបុត្រផ្ទាល់ខ្លួនមួយផ្ញើទៅកាន់ប្រធានាធិបតីរុស្ស៊ី។ លោក Trump បានប្រគល់សំបុត្រនោះទៅលោក Putin។

នៅលើបណ្ដាញសង្គមកាលពីល្ងាចថ្ងៃចន្ទ ដោយមិននិយាយអំពីប្រទេសជាក់លាក់ណាមួយ តាមរយៈការបង្ហោះសាររបស់លោក លោកប្រធានាធិបតីអាមេរិក បានលើកឡើងថា៖ «ខ្ញុំ Trump និងមេដឹកនាំអឺរ៉ុប បានពិភាក្សាគ្នាអំពីបញ្ហាដ៏ធំរបស់ពិភពលោក ពាក់ព័ន្ធនឹងការបាត់ខ្លួនរបស់កុមារ។ នេះក៏ជាប្រធានបទធំមួយ ដែលត្រូវបានលើកយកមកជជែកជាមួយនឹងភរិយារបស់ខ្ញុំ Melania ផងដែរ»។

អ៊ុយក្រែនបានហៅការចាប់ពង្រាត់ក្មេងៗរបស់ខ្លួនរាប់ម៉ឺននាក់ទៅកាន់ប្រទេសរុស្ស៊ី ឬទៅដែនដីដែលកាន់កាប់ដោយរុស្ស៊ី ដោយគ្មានការយល់ព្រមពីក្រុមគ្រួសារ ឬអាណាព្យាបាលថា ជាឧក្រិដ្ឋកម្មសង្រ្គាម ដែលស្របតាមនិយមន័យនៃសន្ធិសញ្ញាអង្គការសហប្រជាជាតិ ស្តីពីអំពើប្រល័យពូជសាសន៍។ នៅមុននេះ ទីក្រុងមូស្គូបានប្រាប់ថា ខ្លួនបាននិងកំពុងការពារកុមារងាយរងគ្រោះពីតំបន់សង្រ្គាម។

ការិយាល័យសិទ្ធិមនុស្សរបស់អង្គការសហប្រជាជាតិ បានឲ្យដឹងថា ប្រទេសរុស្ស៊ីបានធ្វើទុក្ខបុកម្នេញលើកុមារអ៊ុយក្រែនរាប់លាននាក់ និងបានរំលោភសិទ្ធិរបស់ពួកគេ ចាប់តាំងពីមានការលុកលុយទ្រង់ទ្រាយធំលើអ៊ុយក្រែន ក្នុងឆ្នាំ២០២២៕