ប្រព័ន្ធផ្សព្វផ្សាយរដ្ឋ នៅថ្ងៃអង្គារ (ទី១៩ ខែសីហា) នេះ បានឲ្យដឹងថា មនុស្សយ៉ាងហោចណាស់ ៣នាក់ទៀត បានបាត់បង់ជីវិត អំឡុងពេលមានភ្លៀងធ្លាក់ខ្លាំង នៅភាគខាងជើងប្រទេសចិន ដោយបានធ្វើឲ្យចំនួនអ្នកស្លាប់ឡើងដល់ ១៣នាក់ហើយ ដោយសារព្យុះនាពេលថ្មីៗនេះ នៅទូទាំងតំបន់នេះ ខណៈ ៥នាក់ទៀត នៅតែបាត់ខ្លួន និងមិនមានការបន្ថយនូវការព្យាករពីភ្លៀងធ្លាក់។

ភ្លៀងធ្លាក់ខ្លាំងខុសពីធម្មតា បានកើតមាននៅតំបន់ជាច្រើននៃប្រទេសចិន អំឡុងពេលអាកាសធាតុអាក្រក់ខ្លាំង ចាប់តាំងពីខែកក្កដាមក ដោយទឹកភ្លៀង នារដូវមូសុង នៅតំបន់អាស៊ីបូព៌ា កំពុងបន្តមាននៅភាគខាងជើង និងខាងត្បូង។

ទីភ្នាក់ងារព័ត៌មាន Xinhua បានរាយការណ៍ថា សាកសពមនុស្ស ៣នាក់ ត្រូវបានស្រង់ចេញពីទឹកជំនន់ នៅទីក្រុង Ordos ក្នុងតំបន់ Inner Mongolia ខណៈដែល ៣នាក់ផ្សេងទៀត ត្រូវបានរាយការណ៍ថា បានបាត់ខ្លួនចម្ងាយប្រហែល ៧០គីឡូម៉ែត្រ នៅជិតច្រាំងទន្លេលឿង។

ទូរទស្សន៍បានផ្សព្វផ្សាយថា ភ្លៀងធ្លាក់ខ្លាំង កាលពីថ្ងៃចន្ទ (ទី១៨ ខែសីហា) គឺជាការធ្លាក់ដំបូង ក្នុងចំណោមការព្យាករចំនួន ៣ សម្រាប់ប៉ុន្មានថ្ងៃបន្ទាប់។ អាជ្ញាធរអាកាសធាតុ បានឲ្យដឹងថា កម្រិតទឹកភ្លៀង គឺជាង ២០៤មីលីម៉ែត្រ ក្នុងរយៈពេលមិនដល់ ២៤ម៉ោង នៅតំបន់ដែលសាកសពត្រូវបានប្រទះឃើញ ឬច្រើនជាងទ្វេដងនៃមធ្យមភាគប្រចាំខែ សម្រាប់ខែសីហា។

កាលពីថ្ងៃទី១៦ ខែសីហា ទឹកជំនន់ភ្លាមៗ បន្ទាប់ពីទឹកក្នុងទន្លេមួយ បានឡើងខ្លាំងភា្លមៗ និងបានហូរលិចតំបន់វាលស្មៅ ក្នុងតំបន់នោះ បានសម្លាប់មនុស្សយ៉ាងហោចណាស់ ១០នាក់ និងបានហូរនាំយកអ្នកបោះជំរុំចំនួន ១៣នាក់ នៅជាយក្រុង Bayannur ចម្ងាយប្រហែល ៣៥០គីឡូម៉ែត្រភាគពាយព្យនៃទីក្រុង Ordos។ ប្រតិបត្តិការស្វែងយក និងជួយសង្រ្គោះកំពុងដំណើរការ៕