កងទ័ពជើងទឹកនៃប្រទេសហ្វីលីពីន អូស្ត្រាលី និងកាណាដា នៅថ្ងៃអង្គារ (ទី១៩ ខែសីហា) នេះ បាននិងកំពុងធ្វើនាវាចរណ៍រួមគ្នា នៅសមុទ្រចិនខាងត្បូង ដែលជាតំបន់នៃភាពតានតឹង បន្ទាប់ពីមានការបុកគ្នា រវាងនាវាចិន ២គ្រឿង កាលពីសប្តាហ៍មុន។

នាវាចម្បាំងហ្វីលីពីន BRP Jose Rizal នាវាពិឃាតអូស្ត្រាលី HMAS Brisbane និងនាវាចម្បាំងកាណាដា HMCS Ville de Quebec បានចូលរួមក្នុងប្រតិបត្តិការនេះ ជាអ្វីដែលមន្ត្រីយោធាហ្វីលីពីន បានប្រាប់ថា មិនបានធ្វើឡើងក្នុងគោលបំណងសំដៅទៅប្រទេសណាមួយឡើយ។

អមដោយការបន្ថែមថា ការហាត់សមធ្វើនាវាចរណ៍រួមគ្នានេះ កំពុងប្រព្រឹត្តទៅនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីននោះ លោកវរសេនីយ៍ឯក Dennis Fernandez បានប្រាប់សន្និសីទសារព័ត៌មានថា៖ «សកម្មភាពរបស់យើង គឺផ្អែកលើមូលដ្ឋាន ដែលចែងថា លំហាត់សមត្រូវបានគាំទ្រដោយការធ្វើនាវាចរណ៍ នៅតំបន់ឥណ្ឌូ-ប៉ាស៊ីហ្វិកដោយសេរី និងបើកចំហ ប្រកបដោយសន្តិភាព និងវិបុលភាពនៅក្នុងតំបន់»។

សកម្មភាពហ្វឹកហាត់ដែលបានចាប់ផ្តើមកាលពីថ្ងៃទី១៧ ខែសីហា នៅខេត្តភាគខាងលិចខេត្ត Oriental Mindoro ហើយនឹងបញ្ចប់នៅខេត្ត Palawan គឺជាផ្នែកនៃសមយុទ្ធយោធាដែលកំពុងបន្តមាន រវាងហ្វីលីពីន និងអូស្ត្រាលី។

គួរបញ្ជាក់ថា ដោយមានឈ្មោះថា «Alon» ដែលភាសាហ្វីលីពីន គឺ «រលក» សមយុទ្ធរួមគ្នារយៈពេល ១៥ថ្ងៃដែលបានចាប់ផ្តើមកាលពីថ្ងៃទី១៥ ខែសីហា រួមមានប្រតិបត្តិការផ្លូវទឹក និងផ្លូវគោក ក៏ដូចជាសមយុទ្ធបាញ់គ្រាប់ពិតដែលត្រូវបានរៀបចំឡើង ដើម្បីបង្កើនសមត្ថភាពរបស់យោធារបស់ប្រទេសទាំង២ ក្នុងគោលបំណងធ្វើឲ្យការសហការកាន់តែប្រសើរឡើង៕