មន្រ្តី ២រូបនិយាយពីកិច្ចព្រមព្រៀងដ៏មានសក្តានុពលរយៈពេល ៦០ថ្ងៃ និងការដោះលែងចំណាប់ថ្នូរពាក់កណ្តាលថា អ៊ីស្រាអែលកំពុងសិក្សាលើការឆ្លើយតបរបស់ក្រុមហាម៉ាសលើសំណើបទឈប់បាញ់នៅតំបន់ហ្កាហ្សា ។

កិច្ចខិតខំដើម្បីផ្អាកការប្រយុទ្ធគ្នាទទួលបានសន្ទុះថ្មី រយៈពេល ១សប្តាហ៍កន្លងមកនេះ ក្រោយអ៊ីស្រាអែលប្រកាសផែនការសម្រាប់ការវាយប្រហារថ្មី ដើម្បីគ្រប់គ្រងទីក្រុងហ្កាហ្សា ហើយអេហ្ស៊ីប និងកាតា បាននឹងកំពុងព្យាយាមជំរុញឲ្យមានការចាប់ផ្តើមឡើងវិញកិច្ចប្រជុំដោយប្រយោលរវាងភាគីជម្លោះ លើផែនការបទឈប់បាញ់គាំទ្រដោយសហរដ្ឋអាមេរិក ។

យោងតាមការអះអាងរបស់មន្រ្តីហាម៉ាសមួយរូប បានឲ្យដឹងថា សំណើមួយនេះ រួមទាំងការដោះលែងអ្នកទោសប៉ាឡេស្ទីន ២០០នាក់ដែលជាប់ពន្ធនាគារនៅប្រទេសអ៊ីស្រាអែល និងចំនួនមិនច្បាស់លាស់នៃស្រ្តី និងអនីតិជនជាប់ពន្ធនាគារ ជាការដោះដូរចំណាប់ថ្នូរនៅរស់ ១០នាក់ និងចំណាប់ថ្នូរស្លាប់ ១៨នាក់ចេញពីតំបន់ហ្កាហ្សា ។

ប្រភពសន្តិសុខអេហ្ស៊ីបចំនួន ២ បានបញ្ជាក់ពីរឿងរ៉ាវលម្អិតនេះ ហើយពួកគេបន្តថា ក្រុមហាម៉ាសបានស្នើសុំឲ្យមានការដោះលែងអ្នកជាប់ឃុំប៉ាឡេស្ទីនហ្កាហ្សារាប់រយនាក់ផងដែរ ។

សំណើមួយនេះ នឹងរួមបញ្ចូលការដកចេញដោយផ្នែករបស់កងកម្លាំងអ៊ីស្រាអែល ដែលបច្ចុប្បន្នគ្រប់គ្រងតំបន់ហ្កាហ្សាប្រហែល ៧៥ភាគរយ ហើយនិងការចូលជំនួយមនុស្សធម៌បន្ថែមទៀត ទៅក្នុងដែនដីបិទច្រកមួយនេះ ជាទីដែលមនុស្ស ២,២លាននាក់ ប្រឈមនឹងគ្រោះទុរ្ភិក្សកើនឡើង ។

សូមបញ្ជាក់ថា ជុំចុងក្រោយនៃកិច្ចប្រជុំប្រយោលរវាងភាគីទាំង ២ បញ្ចប់ទៅទាំងភាពទាល់ច្រកកាលពីខែកក្កដាកន្លងទៅ ក្នុងនោះភាគីទាំង ២ បានដាក់ការសន្តីបន្ទោសគ្នាទៅវិញទៅមកសម្រាប់ការខកខាននេះ ៕