យោងតាមការអះអាងរបស់ក្រុមអាជ្ញាធរ បានឲ្យដឹងថា ទឹកជំនន់ដ៏គំហុកបង្កឡើងដោយសារភ្លៀងធ្លាក់ខ្លាំង បានសម្លាប់មនុស្សយ៉ាងហោច ៣៦០នាក់ នៅតំបន់ភាគពាយ័ព្យប្រទេសប៉ាគីស្ថាន ចាប់តាំងពីថ្ងៃសុក្រសប្តាហ៍មុនរហូតមក ។

មនុស្សស្លាប់ជាង ២០០នាក់ ត្រូវបានរាយការណ៍នៅស្រុក Buner ស្ថិតក្នុងខេត្តភាគពាយ័ព្យ Khyber Pakhtunkhwa ។

អាជ្ញាធរគ្រប់គ្រងគ្រោះមហន្តរាយខេត្ត Khyber Pakhtunkhwa និយាយថា មនុស្សស្លាប់ទាំងនេះ រួមទាំងស្រ្តី ២៨នាក់ និងកុមារ ២១នាក់ ។

រូបភាពវីដេអូយានដ្រូន ឃើញទំហំនៃការបំផ្លិចបំផ្លាញ ផ្ទះសម្បែងប្រជាពលរដ្ឋរាយប៉ាយពាសពេញដី កម្ទេចកម្ទីនៅលើដងផ្លូវ ហើយអ្នកស្រុកជួបជុំគ្នា ដើម្បីវាយតម្លៃពីផលខូចខាត ស្របពេលដែលកិច្ចខិតខំជួយសង្រ្គោះកំពុងបន្ត ។

យោងតាមការអះអាងរបស់អាជ្ញាធរគ្រប់គ្រងគ្រោះមហន្តរាយជាតិ បានឲ្យដឹងថា ភ្លៀងធ្លាក់ខ្លាំង បង្កការខូចខាតទ្រង់ទ្រាយធំនៅតាមស្រុកជាច្រើននៅតំបន់ភាគខាងជើងប្រទេសប៉ាគីស្ថាន ក្នុងនោះមនុស្សស្លាប់ច្រើនបំផុតដោយសារទឹកជំនន់ដ៏គំហុក ។

នៅតំបន់ភ្នំ ទឹកជំនន់បានហូរនាំយកទៅផ្ទះសម្បែងប្រជាពលរដ្ឋ អគារ រថយន្ត និងទ្រព្យសម្បត្តិផ្ទាល់ខ្លួនរបស់អ្នកស្រុក ។ ចំណែកឯស្រុក Buner រងផលប៉ះពាល់ខ្លាំងជាងគេបំផុត ។

លោក Abid Wazir គឺជាមន្រ្តីក្នុងតំបន់និយាយប្រាប់ទីភ្នាក់ងារព័ត៌មានរ៉យទ័រថា កិច្ចខិតខំជួយសង្រ្គោះបានចាប់ផ្តើមឡើងវិញនៅថ្ងៃនេះ នៅតំបន់រងគ្រោះដោយសារទឹកជំនន់ រយៈពេលច្រើនម៉ោងក្រោយភ្លៀងធ្លាក់ខ្លាំង បង្ខំឲ្យក្រុមជួយសង្រ្គោះផ្អាកការងាររបស់ពួកគេកាលពីថ្ងៃចន្ទ ។

ភ្លៀងធ្លាក់ខ្លាំង និងទឹកជំនន់ដ៏គំហុកកាលពីថ្ងៃចន្ទ បានវាយប្រហារផងដែរតំបន់ជាច្រើននៅខេត្តភាគពាយ័ព្យមួយនេះ រួមទាំងនៅស្រុក Swabi ជាទីដែលមនុស្ស ១១នាក់ បានស្លាប់ ៕