ការិយាល័យប្រធានាធិបតី បានឲ្យដឹងថា មេដឹកនាំបារាំង លោក Emmanuel Macron និងនាយករដ្ឋមន្ត្រីអង់គ្លេស លោក Keir Starmer នឹងធ្វើជាសហប្រធាននៃកិច្ចប្រជុំសម្ព័ន្ធឆន្ទៈរួម ស្ដីពីបញ្ហាអ៊ុយក្រែន នាយប់ថ្ងៃអង្គារ (ទី១៩ ខែសីហា) នេះ បន្ទាប់ពីមានកិច្ចពិភាក្សា នៅទីក្រុងវ៉ាស៊ីនតោន សហរដ្ឋអាមេរិក។

ការិយាល័យ Elysee របស់លោក Macron បានបន្ថែមថា ប្រទេសទាំងអស់ នឹងធ្វើការលើការធានាសន្តិសុខ សម្រាប់អ៊ុយក្រែន។ ចំណែកអ្នកនាំពាក្យរដ្ឋាភិបាលប៉ូឡូញ បានប្រាប់ថា នាយករដ្ឋមន្ត្រីប៉ូឡូញ លោក Donald Tusk ក៏គ្រោងនឹងចូលរួមកិច្ចប្រជុំសម្ព័ន្ធឆន្ទៈរួមនេះដែរ ដែលតាមមកដោយកិច្ចប្រជុំក្រុមប្រឹក្សាអឺរ៉ុប នៅម៉ោង ១១:០០ព្រឹក (ម៉ោងក្នុងស្រុក)។

រីឯអ្នកនាំពាក្យរដ្ឋាភិបាលទីក្រុងប៊ែរឡាំង បានបញ្ជាក់ថា លោកអធិការបតី Friedrich Merz នឹងចូលរួមនៅក្នុងសន្និសីទតាមវីដេអូ ជាអ្វីដែលហៅថា «សម្ព័ន្ធឆន្ទៈរួម» ដើម្បីបន្តការពិភាក្សា ស្តីពីការធានាសន្តិសុខ សម្រាប់អ៊ុយក្រែន។

អ្នកនាំពាក្យរូបនេះបានឲ្យដឹងនៅក្នុងសេចក្តីថ្លែងការណ៍មួយថា បន្ទាប់មក នៅវេលាម៉ោង ១៣:០០ ម៉ោងក្នុងស្រុក (ត្រូវនឹងម៉ោង ១១:០០ ម៉ោងកសល) លោក Merz នឹងចូលរួមសន្និសីទតាមវីដេអូមួយដែលរៀបចំដោយប្រធានក្រុមប្រឹក្សាអឺរ៉ុប លោក António Costa ដើម្បីរាយការណ៍ទៅសមាជិកទាំងអស់នៃក្រុមប្រឹក្សាអឺរ៉ុប ស្តីពីការពិភាក្សា នៅទីក្រុងវ៉ាស៊ីនតោន កាលពីថ្ងៃចន្ទ (ទី១៨ ខែសីហា) ដែលរួមមានវត្តមានរបស់អ៊ុយក្រែនផងដែរ។

សម្រាប់នាយករដ្ឋមន្ត្រីហ្វាំងឡង់ លោកស្រី Sanna Marin មេដឹកនាំរូបនេះបាននិយាយថា វាគឺលឿនពេកហើយ ក្នុងការកំណត់ថា តើប្រទេសហ្វាំងឡង់មានតួនាទីបែបណា ក្នុងការផ្តល់ការធានាសន្តិសុខ សម្រាប់អ៊ុយក្រែននោះ៕